აშშ-ის პრეზიდენტმა რელიგიური თავისუფლებების შესახებ განკარგულებას ხელი მოაწერა. განკარგულება ეკლესიებსა და რელიგიურ ორგანიზაციებს პოლიტიკური აქტიურობის საშუალებას აძლევს. ამის შესახებ ინფორმაციას ”ბი-ბი-სი” ავრცელებს.

მედიის ცნობით, განკარგულების მიხედვით, რელიგიურ ორგანიზაციებს საშუალება ექნებათ, არჩევნებზე ღიად დაუჭირონ მხარი პოლიტიკურ პარტიებს ან კანდიდატებს და აწარმოონ პოლიტიკური საქმიანობა.

ლგბტ თემის უფლებების დამცველი ორგანიზაციები, ასევე სხვადასხვა უფლებადამცველთა ჯგუფები განკარგულების წინააჭმდეგ გამოვიდნენ.

ტრამპმა განკარგულებას ხელი თეთრ სახლში კონსერვატიულ-რელიგიური გაერთიანებებთან  შეხვედრის დროს მოაწერა. „ჩვენ აღარ დავუშვებთ, რომ რელიგიური ადამიანები დაჩაგრონ ან დუმილი აიძულონ. ეკლესიას დავუბრუნებთ მის ხმას“, - განაცხადა დონალდ ტრამპმა ხელმოწერის დროს, თუმცა იმისთვის რომ ეს ბრძანება ძალაში შევიდეს, აუცილებელია კონგრესის თანხმობა.