რუმინეთის დედაქალაქში მასშტაბური ანტისამთავრობო აქცია მიმდინარეობს. მისი მონაწილეები მინისტრთა კაბინეტისა და ადგილობრივი ხელისუფლების გადადგომას მოითხოვენ.

AssociatedPress-ის ინფორმაციით, 20 ათასამდე პროტესტანტმა რამდენიმე ქუჩა დაიკავა და სხვადასხვა სახელმწიფო დაწესებულებებისკენ გაემართა.

მომიტინგეები პრემიერ-მინისტრის, ვიცე-პრემიერისა და ბუქარესტის მერის გადადგომას მოითხოვენ. საპროტესტო გამოსვლები ღამის კლუბში მომხდარი ტრაგედიის შემდეგ დაიწყო. როგორც ცნობილია, კლუბში გაჩენილ ხანძარს 30-ზე მეტი ადამიანი ემსხვერპლა.

პოლიციელთა კორდონებმა მომიტინგეებს მთავრობის შენობასთან მიახლოების საშუალება არ მისცეს. ამის შემდეგ მათ შინაგან საქმეთა სამინისტროსთან და მერიასთან გადაინაცვლეს.

პრემიერ-მინისტრმა ვიქტორ პონტამ თანამდებობიდან უკვე გაათავისუფლა მომხმარებელთა უფლებების დაცვის ეროვნული სააგენტოს დირექტორი. თუმცა მანიფესტანტები ამ ღონისძიებას არასაკმარისად მიიჩნევენ და პონტას გადადგომას მოითხოვენ.

 31 ოქტომბერს ბუქარესტის ღამის კლუბში ხანძარი პიროტექნიკის გამოყენების შედეგად გაჩნდა. კლუბში მყოფმა ადამიანებმა შენობის დატოვება დროულად ვერ შეძლეს. ჭყლეტვაში 200-მდე ადამიანი დაშავდა. კლუბში 400-მდე ადამიანი იმყოფებოდა, რაც დაშვებულზე გაცილებით ბევრი იყო. ქვეყანაში სამდღიანი გლოვა გამოცხადდა.