აჭარის 2016 წლის რესპუბლიკური ბიუჯეტის შემოსულობების საპროგნოზო მაჩვენებელი 210 173,5 ათას ლარს შეადგენს. 2016 წლის რესპუბლიკური ბიუჯეტის პროექტის მიხედვით საშემოსავლო გადასახადის საპროგნოზო მაჩვენებელი140 000,0 ათასი ლარით განისაზღვრა, ბიუჯეტის სხვა შემოსავლების საპროგნოზო მაჩვენებელი კი - 7 725,0 ათასი ლარით.

ბიუჯეტის პროექტიდან ირკვევა, რომ საკუთრებიდან მისაღები შემოსავლების საპროგნოზო მაჩვენებელი 2016 წლისთვის 7 325,0 ათასი ლარია, საიდანაც პროცენტების საპროგნოზო მაჩვენებელი 5 000,0 ათას ლარს, დივიდენდების საპროგნოზო მაჩვენებელი 1 200,0 ათას ლარს, ხოლო რენტის საპროგნოზო მაჩვენებელი 1 125,0 ათასი ლარს შეადგენს.

აჭარის 2016 წლის რესპუბლიკური ბიუჯეტის პროექტის თანახმადვე, საქონლისა და მომსახურების რეალიზაციიდან მისაღები შემოსავლების საპროგნოზო მაჩვენებელი 300,0 ათასი ლარით განისაზღვრა, საიდანაც არასაბაზრო წესით გაყიდული საქონლისა და მომსახურებიდან მისაღები შემოსავლების საპროგნოზო მაჩვენებელი 300,0 ათასი ლარია.

ბიუჯეტის პროექტის თანახმად, სანქციებით (ჯარიმები და საურავები) მისაღები შემოსავლების საპროგნოზო მაჩვენებელი 100,0 ათასი ლარის ოდენობით განისაზღვრა. არაფინანსური აქტივების (კლების) მაჩვენებელი 15 000,0 ათასი ლარით, ხოლო ფინანსური აქტივების კლების საპროგნოზო მაჩვენებელი 47 448,5 ათასი ლარის ოდენობით განისაზღვრა.

აღსანიშნავია, რომ 2015 წლის ავტონომიური რესპუბლიკის რესპუბლიკური ბიუჯეტის შემოსულობები 170 292,9 ათასი ლარით იყო განსაზღვრული. 2015 წლის ბიუჯეტის თანახმად, რესპუბლიკური ბიუჯეტის გადასახადების საპროგნოზო მაჩვენებელი 147 000,0 ათას ლარს შეადგენს, რესპუბლიკურ ბიუჯეტში გადასახადების კუთხით ირიცხება მხოლოდ საშემოსავლო გადასახადი.