ნატო-ს საპარლამენტო ასამბლეის საგაზაფხულო სესიის პლენარულ სხდომაზე საქართველოს მხარდამჭერი დეკლარაცია მიიღეს.

საპარლამენტო ასამბლეის წევრებმა დოკუმენტს კენჭი თბილისში, დღეს გამართულ პლენარულ სხდომაზე უყარეს. დეკლარაციას მხარი საპარლამენტო ასამბლეის  თითქმის ყველა მონაწილემ დაუჭირა.

დეკლარაციაში დამატებები შევიდა, რომელიც პლენარულ სხდომაზე, ქართულმა მხარემ წარადგინა. კერძოდ, შესწორება მე-18 მუხლს ეხებოდა, სადაც საუბარია რუსეთის მიმართ მოწოდებებზე, რომ რუსეთმა საქართველოს ოკუპირებულ ტერიტორიებზე საერთაშორისო მონიტორები  დაუშვას.

დეკლარაციის ავტორი შესწორებას ერთხმად დაეთანხმა. შესაბამისად, მე-18 მუხლში იქნება ჩანაწერი - „უზრუნველყოს (რუსეთის ფედერაციამ) თავისუფალი გადაადგილება და ვაჭრობა ადმინისტრაციული საზღვრის გასწვრივ“.

პლენარულ სხდომაზე აღინიშნა, რომ ნატო-ს საპარლამენტო ასამბლეის მხრიდან დეკლარაციის მიღება სოლიდარობის მაჩვენებელია საქართველოს მიმართ.