ნატო-ს საპარლამენტო ასამბლეის პლენარულ სხდომაზე მიღებული დეკლარაციით ნატო-მ ჩვენი ქვეყნისკენ სერიოზული ნაბიჯი გადმოდგა",- საპარლამენტო უმცირესობის ლიდერი დავით ბაქრაძე ნატო-ს საპარლამენტო ასამბლეის დღევანდელ დეკლარაციას აფასებს. ბაქრაძის თქმით, დეკლარაციის პრაქტიკულად ერთხმად მიღება მნიშვნელივანია, რაც საქართველოს მიმართ მხარდაჭერის მკაფიო დემონსტრირებაა. 

„დეკლარაციაში ორი ბლოკია. პირველი ბლოკი საქართველოს ტერიტორიების მთლიანობის, ევროატლანტიკური მომავლისა და ნატო-ში გაწევრიანების მტკიცე მხარდაჭერაა. მნიშვნელოვანია მეორე ბლოკი, სადაც საუბარია როგორი უნდა იყოს საქართველო, რომ ნატო-ს წევრი გახდეს. უფრო დემოკრატიული მედია პლურალიზმით, უკეთესი სასამართლოთი და ძლიერი ოპოზიციით. დეკლარაციის ორივე ნაწილი ერთმანეთს ავსებს. ორივე ნაწილი არის გზა წინ, გზა უკეთესი ევროპული საქართველოსკენ“,- აღნიშნავს ბაქრაძე.

მისივე თქმით, ამ დეკლარაციით ნატო-მ ჩვენი ქვეყნისკენ სერიოზული ნაბიჯი გადმოდგა და ახლა საქართველოს ხელისუფლებაზეა დამოკიდებული რამდენად შევძლებთ ამ ნაბიჯის გამოყენებას, ამ ქვეყანაში რამდენად შევძლებთ უკეთესი დემოკრატიის მშენებლობას და უახლოეს წლებში ჩვენი ამოცანის შესრულებას, ნატო-ში გაწევრიანებას. 

„უკეთესი ქართული დემოკრატია დღესაც ნატო-ში გაწევრიანების პირობაა. ქართული შიდა დემორაკტია ნატოში ჩვენი მომხრეებისთვის არგუმენტი უნდა იყოს, საქართველო ნატო-ში რატომ უნდა მიიღონ და საქართველოს სკეპტიკოსების წინააღმდეგ არგუმენტი იმისთვის, რომ საქართველო ნატო-ში ყოფნას იმსახურებს. ამიტომ კარგია, რომ დეკლარაციაში ქართულ დემოკრატიის განვითარების საკითხს ასეთი მნიშვნელოვანი ადგილი უჭირავს", - განაცხადა დავით ბაქრაძემ.

ნატო-ს საპარლამენტო ასამბლეის საგაზაფხულო სესიის პლენარულ სხდომაზე საქართველოს მხარდამჭერი დეკლარაცია დღეს მიიღეს.