უკრაინის იუსტიციის სამინისტრომ ოდესის ოლქის ყოფილ გუბერნატორს მიხეილ სააკაშვილს პარტიის რეგისტრაციაზე უარი უთხრა. ამის შესახებ სააკაშვილის გუნდის წევრმა ოლგა გალაბალამ ისუტიციის სამინისტროსთან გამართულ მიტინგზე განაცხადა.

გალაბალას თქმით, იუსტიციის სამინისტრომ პარტიის დარეგისტრირებაზე უარი უთხრა, თუმცა მისი თქმით, დაარეგისტრირა „ფეიკური“ „მიხეილ სააკაშვილის ბლოკი“, რომელსაც სააკაშვილთან არანაირი კავშირი არ აქვს.

თავის მხრივ სააკაშვილმა განაცხადა, რომ ხელისუფლებამ დაარეგისტრირა პარტია, რომლის ხელმძღვანელიც თავს მიხეილ სააკაშვილად ასაღებს.

საქართველოს ექს-პრეზიდენტის თქმით, ამ ადამიანმა მანამდე უკრაინის საპრეზიდენტო არჩევნებში თავისი სახელი დართ ვეიდერით შეიცვალა.

მისივე თქმით, ხელისუფლება გეგმავს შექმნას „ჯიბის პარტია“ მისი სახელის ქვეშ, რათა მომავალ საპარლამენტო არჩევნებში ამომრჩეველთა ხმები მიიღოს.