რეგიონში ინვესტიციების მოზიდვის ხელშეწყობისთვის აჭარის მთავრობა 9 %-ით მეტ თანხას დახარჯავს, ვიდრე ეს 2015 წლის ბიუჯეტით ქონდა გათვალისწინებული. აჭარის ფინანსთა და ეკონომიკის სამინისტროში განმარტავენ, რომ 2016 წელს აჭარის საინვესტიციო პოტენციალის პრომოუშენისთვის 295 ათასი ლარი დაიხარჯება. ეს იმ ფონზე, როდესაც მიმდინარე წელს აღნიშნული მიმართულებით, ბიუჯეტიდან 270 ათასი ლარი იყო გამოყოფილი. უწყებაში განმარტავენ, რომ პროექტის ფარგლებში, მომვალ წელს დაგეგმილია რეგიონის საინვესტიციო პოტენციალის შესახებ საპრომოუშენო მასალების მომზადება, საერთაშორისო საინვესტიციო ტურების ორგანიზება და ასევე ბათუმის საერთაშორისო საინვესტიციო ფორუმი -Invest in Batumi 2016-ის ჩატარება.

აჭარის ფინანსთა და ეკონომიკის სამინისტროს ინფორმაციით, მიმდინარე წელს, რეგიონის პრომოუშენისთვის გეგმით გათვალისწინებული ბიუჯეტის 79,3 %-ი უკვე ათვისებულია.

მიმიდნარე წელს კი სამინისტროს მიერ განხორციელდა რეგიონის საინვესტიციო საპრომოუშენო მასალების განახლება (ჟურნალი Invest In Batumi, ბორშურები - Doing Business, Facts and Figures, Gambling, და Miracle). მომზადდა ორი ვიდეო პრეზენტაცია - ქობულეთის თავსუფალი ტურისტული ზონა და გოდერძის სამთო სათხილამურო პროექტის შესახებ.

ასევე, ღონისძიების   „საერთაშორისო საინვესტიციო ტურების ორგანიზების“ ფარგლებში რეგიონის საინვესტიციო პოტენციალის პრომოუშენის მიზნით მოეწყო ბიზნესფორუმები ყაზახეთის რესპუბლიკაში ქალაქ ასტანაში, თურქეთის რესპუბლიკაში ქალაქ სტამბოლში.

“ბიზნეს ფორუმის ფარგლებში მოხდა რეგიონის საინვესტიციო პოტენციალის, სახელმწიფოს მიერ ინიცირებული პროექტების პრეზენტაცია, მოეწყო ე.წ. B2B შეხვედრები ქართულ და უცხოურ კომპანიებს შორის. ფორუმის ორგანიზებაში მონაწილეობას ღებულობენ უცხოური ქვეყნის სავაჭრო-სამრეწველო პალატები და მათი წევრი კომპანიები. 20 ნოემბრისთვის დაგეგმილია „მინსკი-ბათუმისაინვესტიციო ფორუმი“ ბელარუსის რესპუბლიკაში“, აცხადებენ აჭარის ფინანსთა და ეკონომიკის სამინისტროში.

2015 წლის 18 სექტემბერს ჩატარდა ასევე, მეორე საინვესტიციო ფორუმი, რომელშიც მონაწილეობა დაახლოებით 250 ადამიანმა მიიღო. ღონისძიებაში მონაწილეობდნენ ჩინეთიდან, თურქეთიდან, აზერბაიჯანიდან, ყაზახეთიდან, ავტრიიდან, ერაყიდან, არაბთა გაერთიანებული ემირატებიდან, იაპონიიდან, ესპანეთიდან, თურქმენეთიდან, ბალტიისპირა ქვეყნებიდან, სომხეთიდან ჩამოსული კომპანიების წარმომადგენლები.

2015 წელს განხორციელდა საინვესტიციო საპრომოუშენო ვიდეო რგოლის გადაღება აჭარის საინვესტიციო პოტენციალის შესახებ, გადაღებებმა მოიცვა როგორც ქალაქი ბათუმი ასევე აჭარის მაღალმთიანეთი.