ისრაელის არაბული ქალაქის ცენტრში ასობით მოქალაქე პოლიციის განყოფილებას თავს დაესხა. ერთ-ერთმა სამართალდამცველმა მათ ცეცხლი გაუხსნა, რის შედეგად ერთი ახალგაზრდა მამაკაცი დაიღუპა.

ქალაქ ქფარ-ქასემში მღელვარება მას შემდეგ დაიწყო, რაც ისრაელის პოლიციამ ძებნაში მყოფი მოქალაქე დააკავა.

სამართალდამცველების ინფორმაციით, თავდამსხმელები პოლიციის განყოფილებას ქვებს ესროდნენ. უწესრიგობების დროს დაიწვა სამი ავტომობილი.

პოლიციის ინფორმაციით, ერთ-ერთმა სამართალდამცველმა თავდამსხმელებს ცეცხლი გაუხსნა და 21 წლის ადგილობრივი მცხოვრები სასიკვდილოდ დაჭრა.

მომხდარზე გამოძიება დაწყებულია. ქფარ-ქასემში გადასროლილია პოლიციის დამატებითი ძალები.