„აქცია ჩვენი პროტესტის არც დასაწყისი ყოფილა და არც დასასრული იქნება. გვახსოვს და გვემახსოვრება ძალადობრივ ნარკოპოლიტიკას შეწირული დემურ სტურუა, ლევან აბზიანიძე თუ სხვა ათასობით მსხვერპლი”, - ამის შესახებ „თეთრი ხმაურის მოძრაობა“ სოციალურ ქსელ Facebook-ში წერს.

მოძრაობის განცხადებით, მართალია, მისასალმებელია აქციის სამივე მოთხოვნაზე აღმასრულებელი ხელისუფლების უმაღლეს პირთა მკაფიო რეაგირება, თუმცა საზოგადოება ელის კონკრეტულ, ხელშესახებ შედეგებს.

 “თეთრი ხმაურის მოძრაობა ვეხმაურებით მიმდინარე მოვლენებს და გთავაზობთ მცირე შეფასებას.

უპირველეს ყოვლისა განსაკუთრებულ მადლობას ვუხდით აქციაზე მოსულ თითოეულ ადამიანს. დემონსტრაცია იყო ნათელი დადასტურება, რომ საზოგადოება, ისე როგორც არასდროს, არის ერთიანი და მტკიცე სისტემური ცვლილებების აუცილებლობის საკითხში, სამოქალაქო პოლიტიკა კი თანდათან იმკვიდრებს საკუთარ ფასდაუდებელ ადგილს. განსაკუთრებული სიამაყით გვსურს აღვნიშნოთ ის ფაქტი, რომ თვითორგანიზებული ჯგუფების მიერ მხარდამჭერი აქციები საქართველოს ხუთ ქალაქში გაიმართა.

მოთხოვნები

მისასალმებელია აქციის სამივე მოთხოვნაზე აღმასრულებელი ხელისუფლების უმაღლეს პირთა მკაფიო რეაგირება, თუმცა დროა გავცდეთ რიტორიკას, საზოგადოება ელის კონკრეტულ, ხელშესახებ შედეგებს.

პროკურატურის მიერ გავრცელებული განცხადების საფუძველზე შეგვიძლია ვივარაუდოთ, რომ სიტყვისა და გამოხატვის თავისუფლებისთვის დევნილი გიორგი ქებურია და მიშკა მგალობლიშვილი სასწრაფოდ გათავისუფლდებიან საპატიმრო სასჯელისგან, თუმცა პოზიციების ამგვარი მერყეობა აშკარად ადასტურებს სამართალდამცავი სისტემის რეფორმის შესახებ ჩვენი მოთხოვნის საფუძვლიანობას.

ნარკოპოლიტიკის რეფორმა

პრემიერ-მინისტრის და ვიცე-პრემიერის განცხადებებში მკაფიოდ იყო დაფიქსირებული ნარკოპოლიტიკის რადიკალური რეფორმირების საჭიროება. მიგვაჩნია, რომ მთავრობის ამგვარი გზავნილების ფონზე, პარლამენტი ვალდებულია დროულად უზრუნველყოს საკანონმდებლო ცვლილება და მხარი დაუჭიროს ჯანდაცვის კომიტეტისა და ნარკოპოლიტიკის ეროვნული პლატფორმის მიერ მომზადებულ ერთობლივ კანონპროექტს. დროა ერთხელ და სამუდამოდ წარსულში დარჩეს ხალხთან ომი და როგორც სახელმწიფოს, ისე საზოგადოების მთავარი მიზანი გახდეს ერთმანეთზე ზრუნვა.

ჩვენს ერთგულ მხარდამჭერებსა და აქტივისტებს კი შეგახსენებთ, აქცია ჩვენი პროტესტის არც დასაწყისი ყოფილა და არც დასასრული იქნება. გვახსოვს და გვემახსოვრება ძალადობრივ ნარკოპოლიტიკას შეწირული დემურ სტურუა, ლევან აბზიანიძე თუ სხვა ათასობით მსხვერპლი.

უსამართლობას და ფუჭ დაპირებებს არავის ვაპატიებთ.

ხმაური გრძელდება !

ჩვენ მოვიგებთ ომს “! - ნათქვამია მოძრაობის განცხადებაში.