ასეთ ვითარებაში, ჩვენ არ მივიღებთ დღევანდელ საგანგებო განხილვაში მონაწილეობას და ბოიკოტს ვუცხადებთ კონსტიტუციის განხილვის ამ რიგგარეშე პროცესს, - ამის შესახებ „ნაციონალური მოძრაობის“ თავმჯდომარე რომან გოცირიძემ ჟურნალისტებს განუცხადა.

მისი თქმით, გაუგებარია, რატომ გახდა აუცილებელი კონსტიტუციური ცვლილებების რიგგარეშე სხდომებზე განხილვა, როცა ცვლილებების დიდი ნაწილი რვა წლის შემდეგ უნდა ამოქმედდეს.

„პარლამენტში იწყება კონსტიტუციის განხილვა. დღეს არის საგანგებო სხდომა, სადაც განიხილება კონსტიტუციის პროექტი, რომლის ძირითადი ნაწილი რვა წლის შემდეგ შევა მოქმედებაში. ჩვენ არ გვესმის, რატომ არის მნიშვნელოვანი ფორსირებულად რიგგარეშე სხდომის მოწვევა, რომელიც ასევე გააპროტესტა საქართველოს პრეზიდენტმა. ჩვენ არ მიგვიღია მონაწილეობა ბოლომდე საკონსტიტუციო კომისიის მუშაობაში და ის დავტოვეთ. შემოვიდა ერთი დოკუმენტი და ზეპირი განცხადებით გვეუბნებიან მეორეს. ამ დოკუმენტის ძირითადი ნაწილი ძალაში შევა რვა წლის შემდეგ და გადავდივართ პროპორციულ სისტემაზე. ზეპირი მონათხრობით კი გვეუბნებიან, რომ მომავალი არჩევნები ჩატარდება კვლავ შერეული სისტემით, სადაც დარჩება არჩევნების მაჟორიტარული წესი. ჩვენ არ ვიცით, რას ვიხილავთ.

ერთადერთი გვითხრეს ის, რომ პრეზიდენტის პირდაპირი არჩევა იქნება გაუქმებული ანუ მთელი საკონსტიტუციო პროცესი მიმართული იყო ერთადერთი მიზნისკენ, რომ პრეზიდენტის არჩევის უფლება ხალხისთვის ჩამოერთვათ. ეს არის დემოკრატიული პროცესიდან უკან დახევა. ხელისუფლება ცდილობს, კონსტიტუციის საკუთარი მიზნებისთვის მორგებას", - აღნიშნა გოცირიძემ.