ზემო ნიქოზის საჯარო სკოლის მოსწავლეების მშობლებისა და პედაგოგების ნაწილი სკოლის დირექტორს უპირისპირდებიან.

მასწავლებლები თამაზ მელამაშვილის გადადგომას და გათავისუფლებული პედაგოგის მარინე მინდიაშვილის სამსახურში აღდგენას ითხოვენ.

20 ივნისს მარინე მინდიაშვილი დისციპლინარული გადაცდომების გამო სამსახურიდან გაათავისუფლეს. დირექტორის განცხადებით, მას არაერთი საყვედური და გაფრთხილება ჰქონდა მიცემული, თუმცა დაწყებითი კლასების პედაგოგმა ეს არ გაითვალისწინა.

გასულ წელს, დირექტორმა მასწავლებელი მოსწავლის ცემაშიც დაადანაშაულა, თუმცა მაშინ ფაქტი არ დადასტურდა. მოკვლევას ამ და სხვა ფაქტებზე განათლების სამინისტროს შიდა აუდიტი სწავლობდა.

მარინე მინდიაშვილმა სასამართლოს უკვე მიმართა. სკოლის დირექტორსა და პედაგოგებს შორის დაპირისპირებას ბოლო წლების განმავლობაში არაერთხელ ჰქონდა ადგილი. 2008-2010 წლებში სკოლიდან რვა თანამშრომელია გათავისუფლებული. განათლების სამინისტროს შიდა აუდიტი სკოლაში მოკვლევას უკვე ოთხი თვეა აწარმოებს.