„ისლამური სახელმწიფოს“ მებრძოლებმა მოსულის მთავარი მეჩეთი ააფეთქეს
„ისლამური სახელმწიფოს“ მებრძოლებმა მოსულში ან-ნურის მეჩეთი ააფეთქეს. ინფორმაციას ერაყელი სამხედროები ავრცელებენ.
გავრცელებული ინფორმაციით, მებრძოლებმა მეჩეთთან ერთად მინარეთიც დაანგრიეს.
სწორედ ამ მეჩეთში „ისლამური სახელმწიფოს“ ლიდერმა აბუ ბაქრ ალ-ბაღდადიმ სამი წლის წინ „ხალიფათის“ დაარსება გამოაცხადა.
თავის მხრივ „ისლამური სახელმწიფოს“ წარმომადგენლებმა განაცხადეს, რომ მეჩეთი აშშ-ის ავიაციამ გაანადგურა.
ერაყის პრემიერ-მინისტრის ჰაიდერ ალ-აბადის თქმით, მეჩეთის აფეთქება „ისლამური სახელმწიფოს“ დამარცხების ოფიციალური აღიარება გახდა.
მეჩეთი მეთორმეტე საუკუნეშია აგებული.
ერაყის არმია უკვე ცხრა თვეა იერიშს ახორციელებს ძველი მოსულის წინააღმდეგ, რომელიც ჯიხადისტების კონტროლის ქვეშ იმყოფება.
გაეროს მონაცემებით, მოსულში 100 ათასი მშვიდობიანი მცხოვრებია დარჩენილი. ისინი წყლის, პროდუქტებისა და მედიკამენტების დეფიციტის პირობებში იმყოფებიან. იერიშის ახალი ფაზის დაწყებამდე ხელისუფლებამ მოსახლეობას ქალაქის დაუყოვნებლივ დატოვებისკენ მოუწოდა.
