ის რაც ხდება, აჩვენებს, რომ ციანიდი დეკანოზს ჩაუდეს, ამის შესახებ დეკანოზ მამალაძის ადვოკატმა მიხეილ რამიშვილმა განაცხადა.

"ჩვენ გვაინტერესებს, რამდენად შესაძლებელი იყო ციანიდი მამა გიორგი მამალაძეს ჰქონოდა შესყიდული და ჩანთაში აღმოჩენოდა. ის, რაც ხდება, აჩვენებს, რომ ჩადებულია ციანიდი და ამის თქმის საფუძველს მაძლევს ის, რომ დაცვის სამსახურს ნებისმიერი ჩემოდნის გახსნა შეუძლია ეჭვის საფუძველზე", - განაცხადა მიხეილ რამიშვილმა.

დღეს, თბილისის საქალაქო სასამართლოში დეკანოზ გიორგი მამალაძის საქმეზე პროკურატურის მოწმეები დაიკითხნენ. პროცესის შესვენების დროს საქმის პროკურორმა ჯარჯი წიკლაურმა განაცხადა, რომ ბრალდებულ მამალაძეს ციანიდი „დეზედორის“ თავსახურში ჰქონდა შენახული, რასაც აეროპორტის თანამშრომლები და დეკანოზის პირველი ადვოკატი რევაზ ფუტკარაძეც დაადასტურებს. რევაზ ფუტკარაძე დეკანოზ გიორგი მამალაძის ადვოკატი მხოლოდ გამოძიების დაწყებისას, პირველი რამდენიმე საათის განმავლობაში იყო.