ერთიანი ეროვნული გამოცდები, რომელშიც 39 000-მდე აბიტურიენტი მონაწილეობს, დღეს 3 ივლისს დაიწყო.

როგორც  შეფასებისა და გამოცდების ცენტრის ხელმძღვანელმა მაია მიმინოშვილმა ჟურნალისტებს განუცხადა, რეგისტრაცია დილის 8:00 საათზე, საგამოცდო პროცესი კი ზუსტად 09:00 საათზე დაიწყო.

"დღეს აბიტურიენტები გამოცდას აბარებენ ქართულ ენასა და ლიტერატურაში. ერთიანი ეროვნული გამოცდებისთვის 41 ათას 500 აბიტურიენტზე მეტი იყო რეგისტრირებული. თუმცა აბიტურიენტების გარკვეული რაოდენობა გამოაკლდა პროცესს, რადგან გამოსაშვებ გამოცდებზე ვერ გადალახეს ბარიერი, აქედან გამომდინარე 39 ათასამდე აბიტურიენტი იღებს მონაწილეობას გამოცდებში. მთელი საქართველოს მასშტაბით 22 საგამოცდო ცენტრი მუშაობს. წელს ერთი ახალი საგამოცდო ცენტრი დაემატა თბილისში", - განაცხადა მაია მიმინოშვილმა. 

მიმინოშვილის განმარტებით, პირველ ნაკადში 9 ათასამდე აბიტურიენტი იღებს მონაწილეობას. 

"ქართულ ენასა და ლიტერატურაში იქნება ორი დღე გამოცდა, დღეს და ხვალ, შემდეგ ოთხშაბათს იქნება შესვენება. ხუთშაბათს და პარასკევს ვაგრძელებთ პროცესებს და აბიტურიენტები ჩააბარებენ ზოგად უნარებში გამოცდებს. გარკვეული პერიოდის შემდეგ გვეცოდინება რამდენმა აბიტურიენტმა დააგვიანა გამოცდაზე. წელს არ გვქონია შემთხვევა, რომ საგამოცდო ცენტრი არეოდა აბიტურიენტს", - განაცხადა მიმინოშვილმა. 

მისივე თქმით, წელს 18 მსჯავრდებული აბიტურიენტია.

"ერთი არის ქუთაისში, დანარჩენი თბილისში, რომლებიც ხვალ ჩააბარებენ გამოცდას, მათგან ერთი გოგოა", - დასძინა მიმინოშვილმა.