მერაბ ბერძენიშვილის სახელობის საერთაშორისო კულტურულ ცენტრ „მუზაში“, არასამთავრობო ორგანიზაციის „მარტოხელა დედათა და ბავშვთა დაცვის ასოციაციის - მომავლის მზე“ პრეზენტაცია შედგა.

ასოციაციაში აცხადებენ, სულ რამდენიმე თვეა რაც ჩამოყალიბდა ეს ასოციაცია და დღეისათვის საქართველოში იგი პირველია, რომელიც მარტოხელა დედათა პრობლემას შეეხო.

ორგანიზაცია თავად მარტოხელა დედამ თეონა ფირანიშვილმა ჩამოაყალიბა და იგი რამდენიმე ათეულ წევრს ითვლის.

დაუზუსტებელი მონაცემებით, საქართველოში მათი რაოდენობა 30 ათასამდე მერყეობს. ასოციაცია, ასევე, აერთიანებს იმ ბავშვებს, რომლებმაც მშობელი სხვადასხვა მიზეზით დაკარგეს.

ორგანიზაციის „მომავლის მზე“ მიზანი, მარტოხელა დედათა და ბავშვთა შესახებ საზოგადოებაში არსებული სტიგმის წინააღმდეგ ბრძოლაა, ასევე, მათი სოციალურ ეკონომიური პირობების გაუმჯობესებისათვის სხვადასხვა ღონისძებების გატარებაა, მათ შორის საკანონმდებლო ინიცირება.

ღონისძიება „მუზაში“ ქართველი მომღერლების მონაწილეობით გაიმართა. პრეზენტაციაზე ორგანიზაციის „მომავლის მზე“ და სამედიცინო დარგობრივ ასოციციებს შორის ურთიერთანამშრომლობის მემორანდუმებს მოეწერა ხელი.

„პროფესიით ექიმი ვარ და პროფესია მავალდებულებს, რომ დავეხმარო ადამინს, მითუმეტეს მარტოხელა დედას, ბავშვს. ცოტა უხერხულიც კი არის ამაზე ლაპარაკი, რადგან უნდა დავეხმაროთ, გაჭირვებულს, მარტოხელას. ჩვენ სიმღერით შეგვიძლია გავუთბოთ ადამიანებს გულები და განვაწყოთ ქველმოქმედებისთვის. მატერიალურადაც დავეხმარები მათ, გავიგებ პირობებს, რა როგორ არის და მათ გვერდით ვიქნები“, - განაცხადა მომღერალმა ლაშა ღლონტმა.

საღამო, სპეციალურად შექმნილი ჰიმნით დასრულდა, რომელიც მუსიკოსმა აჩი ფურცელაძემ დაწერა და იგი მომღერლებთან ერთად ქართული მედიის წარმომადგენლებმა შეასრულეს.

სიმღერა სტუდიაში „უნივერსალი“ ჩაიწერა, ხმის რეჟისორი გიორგი მაისურაძე (მუზა), ტექსტის ავტორი ნანა ცინცაძე, არანჟირება დიმკა თეიმურაზოვი.

ღონისძიებას საქველმოქმედო დატვირთვაც ქონდა. საღამოზე შემოსული თანხა, მკურნალობისათვის 1 წლისა და 6 თვის ნინოს გადაეცა.

გიორგი საკარული, PrimeNewsGeorgia