პენტაგონი „ისლამური სახელმწიფოს“ მეთაურის აბუ ბაქრ ალ-ბაღდადის გარდაცვალების შესახებ ინფორმაციას არ ფლობს. ამის შესახებ „როიტერი“ აშშ-ის სამხედრო უწყების წარმომადგენელზე დაყრდნობით იუწყება.
როგორც ცნობილია, ერაყულმა მედიამ გაავრცელა ინფორმაცია, რომ „ისლამურმა სახელმწიფომ“ ალ-ბაღდადის სიკვდილი დაადასტურა. დაჯგუფების განცხადებაში ნათქვამია, რომ ალ-ბაღდადი დაიღუპა და უახლოეს მომავალში მისი მემკვიდრის ვინაობა დასახელდება.

მანამდე გავრცელებული ინფორმაციით, ალ-ბაღდადი 28 მაისს ქალაქ რაქის მისადგომებთან რუსული სამხედრო ავიაციის იერიშის შედეგად დაიღუპა.

ალ-ბაღდადიმ 2014 წელს ახლო აღმოსავლეთში „ისლამური სახალიფოს“ დაარსების შესახებ განაცხადა. მას შემდეგ მედიაში მისი ლიკვიდაციის შესახებ ინფორმაცია არაერთხელ გავრცელდა.