22 ივლისს, ბათუმში, კლუბში „პონტი“ ირაკლი ფირცხალავა ბენდთან ერთად გრანდიოზულ კონცერტს გამართავს. მომღერალი საქართველოში 6 კაციანი შემადგენლობით ჩამოდის.

„პრაიმნიუსჯორჯია“ საღამოს ორგანიზატორს, მსახიობ ლევან სუხიტაშვილს დაუკავშირდა:

22 ივლისს, 22 საათზე დაიწყება კონცერტი. ირაკლი სპეციალურად ამ დღისთვის ჩამოდის საქართველოში და მაყურებელს ძალიან მაგარი საღამო ელოდება. გარდა ამისა, ამავე დღეს ქართველი შემსრულებლებიც მიიღებენ მონაწილეობას, რადგან ირაკლის კონცერტს ვამთხვევთ კლუბის გახსნასაც.

რატომ ირაკლი ფირცხალავა და არა ვინმე სხვა?

ბევრი საინტერესო პროექტი გვაქვს მე და ირაკლის ერთად გასაკეთებელი, თუმცა დეტალებისგან თავს შევიკავებ, რადგან ეს ყველაფერი ცოტა მოგვიანებით გასაჯაროვდება.

კონკრეტულად რას ეხება ეს პროექტები?

ვარსკვლავების ჩამოყვანას ვაპირებთ საქართველოში. ისეთი მომღერლების, რომ ყველა გაოცდება. სხვას ვერაფერს გეტყვით.

საკმაოდ უცნაური და ამავდროულად კრეატიული სახელი „პონტი“ დაარქვით კლუბს.

დიახ. იდეა ჩემი იყო და დავარქვი იმიტომ, რომ კლუბში ყველა პონტის გამო მიდის. შესაბამისად, რომ გეტყვიან სად ხარ? უპასუხებ პონტში. სეზონურად ვიმუშავებთ და ყოველდღე სხვადასხვა ტიპის საღამოები გაიმართება.

როგორც ჩანს ბიზნესით დაინტერესდი…

კლუბებთან ყოველთვის მქონდა კავშირი, სულ მიმყავდა საღამოები და მოკლედ, რომ გითხრათ, კარგად ვერკვევი ამ სისტემაში. შესაბამისად, მეგობრებთან ერთად გადავწყვიტე რომ საკუთარი გამეკეთებინა, რომელიც იქნებოდა სხვებისგან გამორჩული.

გიორგი საკარული, PrimeNewsGeorgia