თუ ევროკავშირი უარს იტყვის თავის რიგებში თურქეთის მიღებაზე, ანკარაში შვებით ამოისუნთქავენ. ამის შესახებ თურქეთის პრეზიდენტმა რეჯებ ტაიპ ერდოღანმა განაცხადა.
„დღეს ჩვენ არამხოლოდ არ გვიწვევნ ევროკავშირის ლიდერების სამიტზე, არამედ დროსაც ტყუილად გვაკარგვინებენ. ასეთია საქმის რეალური ვითარება... თუ ევროკავშირში იტყვიან, რომ ისინი თურქეთს თავის რიგებში არ მიიღებენ, მაშინ ჩვენ შვებით ამოვისუნთქავთ და დავიწყებთ ალტერნატიული გეგმების რეალიზებას“, - განაცხადა ერდოღანმა „ბი-ბი-სი“-სთან ინტერვიუში.

მისი თქმით, თურქეთის მოქალაქეების უმეტესობას ევროკავშირში შესვლა არ სურს და ევროკავშირისა და თურქეთის ურთიერთობას არაგულწრფელად მიიჩნევს.

ევროკავშირსა და თურქეთს შორის ურთიერთობა თურქეთში შეიარაღებული გადატრიალების მცდელობს შემდეგ დაიძაბა. ევროკავშირმა თურქეთის ხელისუფლების შემდგომი ქმედებები, დაპატიმრებები და სხვა ღონისძიებები მკაცრად გააკრიტიკა.

ევროპარლამენტმა მიიღო რეზოლუცია თურქეთთან დაკავშირებით, რომელიც ევროკავშირსა და ევროკომისიას მოუწოდებს დაუყოვნებლივ შეაჩეროს ანკარასთან მოლაპარაკებები ევროკავშირში გაწევრიანების შესახებ, თუ ხელისუფელბა საკონსტიტუციო რეფორმაში სათანადო ცვლილებებს არ შეიტანს.