ვიმედოვნებთ, რომ პირდაპირი დიალოგის დამყარებაში რუსეთის ფედერაცია ჩვენ დაგვეხმარება, - ამის შესახებ „პატრიოტთა ალიანსის“ წევრმა ადა მარშანიამ რუსეთის სახელმწიფო სათათბიროში შეხვედრის შემდეგ განაცხადა.

მისი თქმით, აფხაზებთან და ოსებთან საუბარი აუცილებელია.

„აუცილებლად უნდა ვისაუბროთ როგორც აფხაზებთან, ასევე, ოსებთან და ისიც დავაფიქსირეთ აბსოლუტურად გულახდილად, რომ ვიმედოვნებთ, რომ პირდაპირი დიალოგის დამყარებაში რუსეთის ფედერაცია ჩვენ დაგვეხმარება,“ - განაცხადა ადა მარშანიამ.

პარტიის წევრის, ნატო ჩხეიძის განცხადებით, რომელიც დუმაში შეხვედრაზე ასევე იმყოფებოდა, რუსი დეპუტატები, კერძოდ, ვლადიმერ პუტინის „ედინაია რასიას“ და „კომუნისტური“ პარტიის წევრები მონდომებული არიან, რომ ოკუპირებული აფხაზეთისა და ცხინვალის რეგიონის საკითხები მოგვარდეს.

„საუბარი იყო გაყინულ კონფლიქტებზე. ყველა მონდომებულია, ყოველ შემთხვევაში, დუმაში მონდომებული არიან ის დეპუტატები, რომლებსაც ჩვენ შევხვდით, რომ ნელ-ნელა, ნაბიჯ-ნაბიჯ დაიძრას ეს საკითხები, სოხუმის, ცხინვალის საკითხები და მოხდეს ურთიერთობა“, - აღნიშნა ნატო ჩხეიძემ.