ხორვატიისა და მონტენეგროს მეხანძრეები ცდილობენ ხანძრის ჩაქრობას, რომელიც ადრიატიკის ზღვის სანაპიროს გასწვრივ გავრცელდა. ამის შესახებ ინფორმაციას სააგენტო „ასოშიეიტედ პრესი“ ავრცელებს.

მისი მონაცემებით, ხორვატიაში ცეცხლმა რამდენიმე რაიონი მოიცვა, გავრცელდა ქალაქ შიბენიკის სიახლოვეს და თითქმის საცხოვრებელ სახლებამდე მიაღწია. თუმცა მეხანძრეებმა თვითმფრინავების დახმარებით ცეცხლის შემდგომი გავრცელება აღკვეთეს.

ამის გარდა ვრცელდება ინფორმაცია ხორვატიის დასავლეთით ქალაქ პულასთან ხანძრის გაჩენის შესახებაც, ასევე პაგისა და ვირის კუნძულებზე.

მონტენეგროში მეხანძრეები ძლიერი ქარის გამო სანაპიროს გასწვრივ ცეცხლის ჩაქრობას ვერ ახერხებენ, ხანძარია ქვეყნის დედაქალაქ პოდგორიცას სიახლოვესაც.