პეტერბურგის მახლობლად მეორე მსოფლიო ომში დაკარგული ქართველი მეომრის ნეშტი იპოვეს, -ამის შესახებ ინფორმაციას ვეტერანების საქმეთა სახელმწიფო სამსახური ავრცელებს.

,,რუსეთში, პეტერბურგის მახლობლად აღმოჩენილია მეორე მსოფლიო ომში დაკარგული ქართველი მეომრის - ხუტუ ნიკოლოზის ძე მიმინოშვილის ნეშტი. აბაშის რაიონის კომისარიატის მიერ ხუტუ მიმინოშვილი გაწვეულ იქნა 1939 წელს. ქართველი მებრძოლი მონაწილეობდა საბჭოთა კავშირისა და ფინეთის ომში. 1919 წელს დაბადებული ჯარისკაცის კვალი მეორე მსოფლიო ომის დასაწყისშივე 1941 წლის აგვისტოში იკარგება. 2016 წელს ორგანიზაციამ „საძიებო რაზმი - ჩრდილო საზღვარი“ ქალაქ პეტერბურგის შემოგარენში აღმოაჩინა 13 მეომრის ნეშტი. მათგან ერთ-ერთს ჯიბეში ჰქონდა კოვზი წარწერით - ხუტუ. საარქივო მასალების გამოყენებით დადგინდა კოვზის მფლობელი მეომრის ვინაობა და ორგანიზაციის წევრები დაუკავშირდნენ ხუტუ მიმინოშვილის ოჯახის წევრებს ზუგდიდსა და აბაშაში. ნეშტი ხუტუ მიმინოშვილის ძმისშვილმა იოსებ მიმინოშვილმა გადმოასვენა საქართველოში. ქართველ მეომარს საპატიო ყარაულით და ზალპით, კუკიის საგვარეულო სასაფლაოზე, 23 ივლისს დაკრძალავენ დისა და ძმის გვერდით” , - აცხადებენ უწყებაში.