ბოლო ათი წლის მანძილზე საქართველოში ორჯერ გაიზარდა იმ ადამიანთა რიცხვი, რომლებიც თვლიან, რომ მათი უფლებები დაცულია. მოუხედავად ამისა, საქართველოს ყოველი მეორე მოქალაქე შიშობს, რომ მისი პერსონალური მონაცემები დაუცველია. თითქმის მესამედი (27% საშუალოდ, 36% თბილისში) მიიჩნევს, რომ საქართველოში ყველაზე ხშირად შრომის უფლებები ირღვევა. ხოლო ნახევარზე მეტი თვლის, რომ საქართველოში ირღვევა ეროვნული/ეთნიკური (57%) და რელიგიური (57%)უმცირესობების უფლებები.

ეს შედეგები გამოავლინა ევროკავშირისა (EU) და გაეროს განვითარების პროგრამის (UNDP) დაკვეთით ჩატარებულმა კვლევამ, რომლის მიზანი იყო საქართველოს მოსახლეობის დამოკიდებულების შესწავლა ადამიანის უფლებების დაცვისა და მართლმსაჯულების ხელმისაწვდომობის მიმართ.

კვლევის ანგარიშის წარდგენას, რომელიც 26 ივლისს გაიმართა, ესწრებოდნენ საქართველოს მთავრობისა და პარლამენტის, სამოქალქო საზოგადოების, საელჩოების, საერთაშორისო ორგანიზაციებისა და მედიის წარმომადგენლები.

„ადამიანის უფლებები ევროკავშირისა და საქართველოს ურთიერთობის ქვაკუთხედია. ევროკავშირი ხელს უწყობს საქართველოს მთავრობას ადამიანის უფლებების დაცვის თანმიმდევრული პოლიტიკისა და ეფექტური მექანიზმების შემუშავებაში. ჩვენ ასევე მხარს ვუჭერთ ღია მსჯელობას სამოქალაქო საზოგადოებასა და მოსახლეობასთან“, - განაცხადა ვინსენტ რეიმ, საქართველოში ევროკავშირის წარმომადგენლობის თანამშრომლობის განყოფილების ხელმძღვანელმა, კლევის ანგარიშის წარდგენაზე.

ევროკავშირისა და გაეროს განვითარების პროგრამის (UNDP) კვლევააფასებს მოსახლეობის ინფორმირებულობას ადამიანის უფლებების დაცვისა და მართლმსაჯულების ხელმისაწვდომობის შესახებ  და იძლევა საქართველოში არსებული საზოგადოებრივი წარმოდგენების სურათს.

„კვლევის ანგარიშიმნიშვნელოვან ინფორმაციას აწვდის საქართველოს მთავრობას, სამოქალაქო საზოგადოებას, უფლებადამცველ ინსტიტუტებსა და საქართველოს საერთაშორისო პარტნიორებს, და ხელს უწყობს ჩვენს ერთობლივ ძალისხმევას ადამიანის უფლებების მიმართ პატივისცემის, სამართლიანი, მშვიდობიანი და მდგრადი  განვითარების მისაღწევად“, - აღნიშნა შომბი შარპმა, გაეროს განვითარების პროგრამის (UNDP) მოქმედმა ხელმძღვანელმა საქართველოში.

კვლევა „საქართველოს მოსახლეობის ინფორმირებულობაადამიანის უფლებების დაცვისა და მართლმსაჯულების ხელმისაწვდომობის შესახებ“ ეყრდნობა 5 ათასი პირისპირ გამოკითხვის, 14 ფოკუს ჯგუფისა და 29 ჩაღრმავებული ინტერვიუს შედეგებს. ჩაღრმავებული ინტერვიუები ჩატარდა საჯარო სექტორის, ბიზნესის, არასამთავრობო ორგანიზაციებისა და ლგბტ თემის წარმომადგენლებთან. 

სადაც შესაძლებელია, კვლევის შედეგები შედარებულიაგაეროს განვითარების პროგრამის (UNDP) მიერ2012 წელს განხორციელებული მსგავსი კვლევის მიგნებებთან. 

კვლევა ჩაატარა ქართულმა კვლევითმა კომპანიამ „ეი-სი-თი“ 2016 წლის სექტემბრიდან 2017 თებერვლამდე, ევროკავშირის შემდეგი პროგრამების ფარგლებში - „ადამიანის უფლებები ყველასათვის“ და „მართლმსაჯულება ყველასათვის“. ევროკავშირის ეს ინიციატივები ხელს უწყობენ საქართველოს 2014-2020 წლის ადამიანის უფლებების დაცვის ეროვნული სტრატეგიის განხორციელებას და მართლმსაჯულების სისტემაში მიმდინარე რეფორმებს. 

კვლევის ანგარიში განთავსებულია გაეროს განვითარების პროგრამის (UNDP) ვებ-გვერდზე: www.ge.undp.org