საქართველოს შსს გიორგი მღებრიშვილი არ გამორიცხავს, რომ აბასთუმანში ხანძარი ხელოვნურად იყოს გაჩენილი. როგორც მინისტრმა ჟურნალისტებს განუცხადა, მას ამ ხანძართან დაკავშირებით კითხვები აქვს. 

,,გამოძიება ყოველთვის მუშაობს ყველა ვერსიაზე. თუ ჩემი სუბიექტური აზრი გაინტერესებთ, მეც ვფიქრობ, რომ შეიძლება ხელოვნურად იყოს გაჩენილი, შეიძლება სხვა ფაქტორები იყოს... მე ამას ახლა ვერ გეტყვით. გამოძიება მიმდინარეობს, ყველა ვერსიაზე ვმუშაობთ, ყველა ვერსიას ამომწურავ პასუხს გავცემთ",- განაცხადა მინისტრმა.

ამასთან, მღებრიშვილი ამბობს, რომ ხანძრის სალიკვიდაციო სამუშაოებში ამ ეტაპზე ჯარის ჩართვის საჭიროება არ არის. რაც შეეხება დახმარებას, მინისტრის თქმით, აზერბაიჯანის, თურქეთის და უკრაინის მხრიდან ავიაცია უკვე გზაშია და დღის 3-4 საათისთვის უკვე აბასთუმანში იქნება. 

ბორჯომის ხეობიდან აბასთუმანში გადაინაცვლა საგანგებო შტაბმაც. არაოფიციალური ინფორმაციით, ბორჯომ-ხარაგაულის ტყეში დამწვარია 5 ჰექტარი ფართობი, იწვის წიწვოვანი ხეები. აბასთუმანში ხანძარი გუშინ გაჩნდა.