ოქტომბერში, აჭარაში ტურისტთა განთავსების ობიექტებში, ტურისტების რაოდენობა 2 %-ით გაიზრდა. აჭარის ტურიზმისა და კურორტების დეპარტამენტის ინფორმაციით, აჭარის მასშტაბით რეგისტრირებული ტურისტთა განთავსების ობიექტებში, ოქტომბეში გასული წლის ანალოგიურ პერიოდთან შედარებით, ტურისტების რაოდენობა 1,98 %-ით გაიზარდა. 2015 წლის იანვარ-ოქტომბრის მონაცემებით კი ზრდა 2,78 %-ია.

აჭარის ტურიზმისა და კურორტების დეპარტამენტის სტატისტიკური ინფორმაციის თანახმად, მიმდინარე წლის ოქტომბერში აჭარას სულ 22 151 ვიზიტორი სტუმრობდა, იანვარ-ოქტომბერში კი 416 021 ვიზიტორი.

საზღვრის მონაცემების მიხედვით კი ზრდის დადებითი ტენდენცია განსაკუთრებით დიდია ბათუმის საერთაშორისო აეროპორტში შემოსულ საერთაშორისო ვიზიტორებში. 2015 წლის ოქტომბერში ბათუმის საერთაშორისო აეროპორტში შემოვიდა 5509 უცხოელი ვიზიტორი, რაც 46%-ით მეტია გასული წლის ანალოგიურ პერიოდთან შედარებით.

ქვეყნების მიხედვით პირველი ხუთეული უცველელია: ისრაელი, უკრაინა, თურქეთი, რუსეთი და ბელარუსია. ამათგან განსაკუთრებული გამოიკვეთება ისრაელი სამჯერადი ზრდით, რაც დამატებითი ჩარტერული ფრენების შედეგია.

რაც შეეხება ბათუმის აეროპორტში საერთაშორისო ფრენებით შემოსულ უცხოელ მგზავრთა რაოდენობა იანვარ-ოქტომბრის პერიოდის მონაცემებს, გასულ წელთან შედარებით 14%-ითაა გაზრდილი - სულ 70176 ვიზიტორი.