ქურთთა შეიარაღებულმა ფორმირებებმა დაიწყეს მასშტაბური შეტევა ჩრდილოეთ ერაყში მდებარე ქალაქ სინჯარზე კონტროლის აღსადგენად, რომელიც ”ისლამური სახელმწიფოს” მებრძოლებს აქვთ დაკავებული.

ქურთთა სამეთაურო შტაბის ინფორმაციით, იერიში ადგილობრივი დროით დილის 7 საათზე დაიწყო. ოპერაციაში მონაწილეობს 7 500 მებრძოლი, რომელსაც აშშ-ის მეთაურობით სამხედრო კოალიციის ავიაცია ეხმარება.

სინჯარი ”ისლამური სახელმწიფოს” მებრძოლებმა 2014 წლის აგვისტოში დაიკავეს, რის შემდეგაც ქალაქი ათი ათასობით ქურთმა და იეზიდმა დატოვა. ქალაქში დარჩენილთა უმეტესობა კი ისლამისტებმა დახოცეს.

სინჯარი ”ისლამური სახელმწიფოსთვის” ერთ-ერთი მთავარი სტრატეგიული პუნქტია. ქურთთა შეიარაღებულმა რაზმებმა არაერთხელ სცადეს ქალაქის აღება, თუმცა იქიდან ისლამისტი მებრძოლების გამოდევნა დღემდე ვერ შეძლეს.