მომავალი წლიდან აჭარას დაგეგმილი ღონისძიებების ერთიანი კალენდარი ექნება
მომავალ წელს აჭარის ტურიზმისა და კურორტების დეპარტამენტის ინიციატივით რეგიონში დაგეგმილი ივენთების ერთიანი კალენდარი შეიქმნება.
როგორც დეპარტამენტის ხელმძღვანელი მამუკა ბერძენიშვილი განმარტავს, ერთიანი კალენდარი თავს მოუყრის როგორც სახელმწიფო, ასევე კერძო სექტორის მიერ დაგეგმილ სხვადასხვა ღონისძიებებს, რის საფუძველზეც ტურისტს აჭარაში დასვენების დაგეგმვა უფრო გაუმარტივდება.
„ერთიანი კალენდარის შექმნის ინიციატივა დეპარტამენტს ეკუთვნის და ამის შესახებ მთავრობაც ჩავაყენეთ საქმის კურსში. მთავრობამ შესაბამისი განკარგულება გამოსცა, რომლის მიხედვითაც ყველა სამთავრობო უწყება თავის ბალანსზე არსებული საშემსრულებლო-სახელოვნებო ჯგუფების ღონისძიებების შესახებ მოგვაწვდის ინფორმაციას და ეს ინფორმაცია შემდეგ გაერთიანებული იქნება და დაიტანება ერთიან კალენდარში. ჩვენ კი კალენდრის პოზიციონირებას მოვახდენთ, როგორც ჩვენი ვებგვერდის და ასევე სარეკლამო კამპანიების საშუალებით. მას შემდეგ რაც ღონისძიებები ერთიან კალენდარში გვექნება კონსოლიდირებული, ამის შემდეგ ჩვენ ამ ყველაფერს კერძო სექტორს შევთავაზებთ. მოგეხსენებათ დაგეგმვისა და ინფორმირებულობის კუთხით საქართველოში პრობლემები გვაქვს. დაგეგმვის თვალსაზრისით წინასწარ არ ვიცით ღონისძიებების შესახებ და ვიგებთ საკმაოდ გვიან. შესაბამისად ძნელია ამ ინფორმაციის მიწოდება ტურისტისთვის. ტურისტიც წინასწარ ვერ საზღვრავს და ვერ ითვალისწინებს ამ შეთავაზებებს და ცხადია დასვენების დაგეგმვას ამ ღონისძიებებს ვერ ამთხვევს. ერთიან კალენდართან ერთად, კერძო სექტორს მარკეტინგული და სარეკლამო კამპანიის წარმოებისთვის გათვალისწინებულ ბიუჯეტსაც შევთავაზებთ, რაც საბოლოო ჯამში მათ დაინტერესებას გაზრდის“, – აცხადებს აჭარის ტურიზმის დეპარტამენტის თავმჯდომარე მამუკა ბერძენიშვილი.
დეპარტამენტის ხელმძღვანელს იმედი აქვს, რომ ერთიან კალენდარში წლის განმავლობაში 300-400 ღონისძიება მოიყრის თავს.
