სებ-ის მონაცემებით, ეროვნული ვალუტის გაუფასურების ტენდენციის პარალელურად, კიდევ უფრო საგანგაშო კურსია სავალუტო ჯიხურებსა და ბანკებში.

ამ დროისთვის 1 დოლარის ღირებულებამ 2.5650 ლარი, 1 ევროს ფასმა კი, 3.0430 ლარი შეადგინა.

რაც შეეხება ეროვნული ბანკის მიერ გამოქვეყნებული მონაცემებს,  25 ოქტომბერს ერთი ამერიკული დოლარის ღირებულება 2.5206 იქნება. ერთი ევროს ღირებულება კი 2.9635 ლარი.

დღეს მმართველ გუნდში განაცხადეს, რომ ეროვნული ვალუტის გაუფასურება ქვეყანაში გამართულ არჩევნებს არ უკავშირდება.

„ბოლო დღეებში ოთხი პუნქტით მოხდა ლარის გაუფასურება, ეროვნული ბანკის პირდაპირი მოვალეობაა რომ ჩაერიოს და გააკეთოს განმარტება, რათა მოსახლოებაში არ გაჩნდეს პანიკა და არაჯანსაღი განცდა, რომ ეს პროცესები არჩევნებთანაა დაკავშირებული. კურსთან დაკავშირებით მოხდა რყევა და კიდევ ერთხელ მივმართავ ეროვნულ ბანკს, ადამიანები რომ არ შევიდნენ შეცდომაში და იცოდნენ რა ხდება ქვეყანაში, რასთან არის დაკავშირებული ეს კურსის რყევა, იმედს ვიტოვებ რომ ისინი უახლოეს პერიოდში გამოეხმაურებიან და გააკეთებენ განცხადებას, განმატებას, რაიმე შეფასებას ან ჩაერევიან“,- განაცხადა საპარლამენტო უმრავლესობის წევრმა ლევან კობერიძემ.