ფეისბუქი განაგრძობს ბაზარზე არსებული სერვისების შესრუტვას და ახლა უკვე, საჭმლის შეკვეთის ფუნქციას გვთავაზობს, ამის შესახებ ინფორმაციას საზოგადოებრივი მაუწყებელი ავრცელებს. მოხმარებელს საშუალება ექნება საკვები სახლიდან გაუსვლელად, პირდაპირ ფეისბუქიდან შეუკვეთოს. სერვისი უკვე ჩაეშვა ამერიკის შეერთებულ შტატებში. 

​მას შემდეგ რაც სერვისი საქართველოშიც გააქტიურდება, ფეისბუქის მენიუში უნდა მოძებნოთ ღილაკი Order Food, აარჩიოთ სასურველი რესტორანი, საკვები და დააკლიკოთ ღილაკს Start Order. მითითებულ შეკვეთას ან ადგილზე მოგართმევენ ან თქვენ თვითონ წაიღებთ, სურვილის მიხედვით. 

​აღნიშნული სერვისი რესტორნებისთვისაც მომგებიანია. ისინი საკუთარ მომხმარებლებს უკვე ფეისბუქის საშუალებითაც მიწვდებიან და ფაქტობრივად ონლაინ გაყიდვებს გააქტიურებენ. თუმცა, ფეისბუქის ახალმა წამოწყებამ შეიძლება საკვების მიტანის სერვისის მქონე კომპანიებს სერიოზული ზარალი მიაყენოს.

​ფეისბუქის საჭმლის შეკვეთის ფუნქცია საკმაოდ მრავალფეროვანი იქნება. თქვენ საშუალება გექნებათ საკვები კატეგორიების მიხედვით აირჩიოთ, ნახოთ უახლეს ლოკაციაზე მდებარე რესტორნები, თქვენი მეგობრების შეფასებები და ა.შ.

ფუნქცია ანდროიდებზე, iOS-ებსა და დესკტოპებზეა ხელმისაწვდომი. აშშ-ში წარმატებული დატესტვის შემდეგ ფუნქცია სხვა ქვეყნებსაც გაუაქტიურდებათ.