მადრიდის „რეალის“ ფეხბურთელს კრიშტიანუ რონალდუს ქალიშვილი შეეძინა. მან მადრიდის სამშობიარო სახლში გადაღებული ფოტოები  Instagram-ზე, Twitter-სა  და Facebook-ზე გამოაქვეყნა.

 „დაიბადა ალანა მარტინა! დედაც და ქალიშვილიც თავს კარგად გრძნობენ! ჩვენ ბედნიერები ვართ“, - დაწერა ფეხბურთელმა. Instagram-ზე ფოტოსურათმა უკვე 8 მლნ მოწონება დაიმსახურა.

ახალშობილის დედა რონალდუს 22 წლის მეგობარი გოგო, ესპანელი მოდელი ჯორჯინა როდრიგესია.

ალანა მარტინა ფეხბურთელის მეორე ქალიშვილია და პირველი ბავშვია, რომლის დედის ვინაობაც საზოგადოებისთვის საიდუმლოებას არ წარმოადგენს.

სულ რაღაც ოთხნახევარი თვის წინ ცნობილი გახდა, რომ რონალდუს ტყუპები - ევა და მათეო შეეძინა.

ტყუპების დედის შესახებ არაფერია ცნობილი. თავად სპორტსმენმა მისი ვინაობის დასახელებაზე უარი განაცხადა. მედიის ცნობით, ბავშვები სუროგატმა დედამ გააჩინა.

ასევე ცნობილია, რომ 32 წლის რონალდუს ჰყავს 7 წლის ვაჟი კრიშტიანუ რონალდუ-უმცროსი, რომელიც 2010 წლის 17 ივნისს დაიბადა.

ასევე უცნობია დედამისის ვინაობაც. პრესის მონაცემებით, სუროგატმა დედამ ხელი მოაწერა შეთანხმებას ინფორმაციის გაუცემლობის შესახებ, რისთვისაც რამდენიმე მილიონი ევრო მიიღო.

დედის სახელი არ იცის ბავშვმაც. რონალდუ ადრე ამბობდა, რმ ამაში პრობლემას ვერ ხედავს, რადგან ბიჭს ჰყავს შესანიშნავი, მოსიყვარულე მამა და ნათესავები.

ამასთან ფეხბურთმა აღნიშნა, რომ შვილს ყველაფერს უამბობს, როდესაც ის სრულწლოვანი გახდება.

ფეხბურთელს შვილების გაზრდაში დედამისი ეხმარება.