აჭარის ფინანსთა და ეკონომიკის მინისტრი დავით ბალაძე რეგიონის მთავრობის 3 წლიან მუშაობას დადებითად აფასებს და განმარტავს, რომ ამ ხნის განმავლობაში აჭარაში არაერთი მნიშვნელოვანი პროექტის განახორციელება მოხერხდა.

„აქტიურად ვმუშაობთ ინვესტიციების მოზიდვის მიმართულებით. ინტენსიურ შეხვედრებს ვმართავთ ჩვენს პოტენციურ ინვესტორებთან, როგორც ქვეყნის შიგნით, ასევე მის ფარგლებს გარეთ. წელს საზღვარგარეთ და საქართველოში ჯამში 8 საინვესტიციო ფორუმს გავუწიეთ ორგანიზება და უახლოეს დღეებში ბელარუსში გავმართავთ მსგავს შეხვედრას. ინვესტიციების 2015 წლის 9 თვის შედეგები, წინა წლის ანალოგიურ პერიოდებთან შედარებით საკმაოდ პოზიტიურია“, აღნიშნა დავით ბალაძემ.

მინისტრის თქმით, 2015 წლის 9 თვის ინვესტიციები, წინა წლის ანალოგიურ მაჩვენებლებთან შედარებით 42%-ით, ანუ 76.5 მილიონი აშშ დოლარით გაიზარდა.

„წამყვანი სექტორი წელს ენერგეტიკა (39%) და ტურიზმია (35%). მინდა ხაზი გავუსვა, რომ ენერგეტიკაში განხორციელებული ინვესტიციები ბოლო წლებში მზარდი ტენდენციით იცვლება და თუ წინა წლებში წამყვან პოზიციებზე ტურიზმი და მშენებლობა იყო, წელს უკვე ენერგეტიკის სფეროს გაძლიერება შეიმჩნევა, რაც ცალსახად მისასალმებელია“, განმარტა მინისტრმა.

2015 წლის 9 თვის ინვესტიციების მონაცემები 2014, 2013, 2012 წლის ანალოგიურ პერიოდთან შედარებითაც მნიშვნელოვნად არის გაზრდილი. კერძოდ:

2015 წლის 9 თვის მონაცემები 2012 წლის ანალოგიურ მაჩვენებლებთან შედარებით გაზრდილია 125.2 %-(144.5 აშშ დოლარით).

2015 წლის 9 თვის მონაცემები 2013 წლის ანალოგიურ მაჩვენებლებთან შედარებით გაზრდილია 76.9 %-(113 აშშ დოლარით).

2015 წლის 9 თვის მონაცემები 2014 წლის ანალოგიურ მაჩვენებლებთან შედარებით გაზრდილია 42 %-(76.5 აშშ დოლარით).

„საქართველოს სტატისტიკის ეროვნული სამსახურის ინფორმაციით, ბიზნეს სექტორში დასაქმებულთა რაოდენობა 2015 წლის II კვარტალში, 2014 წლის II კვარტალთან შედარებით 15.1%-ით არის გაზრდილი“, აღნიშნა დავით ბალაძემ, რომელიც რეგიონის მაკრო-ეკონომიკური პარამეტრებითაც კმაყოფილია და განმარტავს, რომ 2015 წლის III კვარტლის მონაცემებით აჭარის ა.რ რესპუბლიკური ბიუჯეტი 117 %-ით შესრულდა და 144 810,5 ათასი ლარი შეადგინა.

2015 III კვარტლის მონაცემები, 2012 წლის ანალოგიურ მაჩვენებელთან შედარებით 44 %-ით, 44 279 168,6 ლარით გაიზარდა.

„მინდა აღვნიშნო, რომ 2015 წლის აჭარის ა.რ რესპუბლიკურ ბიუჯეტს წინა 3 წლის მსგავსად სოციალური მიმართულება აქვს. ჩვენ ვცდილობთ თითოეული პროგრამა პირველ რიგში რეგიონის მცხოვრებთა საჭიროებას მოვარგოთ. ყოველწლიურად ვითვალისწინებთ თანხებს სოციალური სალხების მშენებლობისთვის და მათ უსასყიდლოდ სოციალურად დაუცველ ოჯახებს გადავცემთ. 2013 – 2015 წლებში 184 ოჯახს გადაეცა ბინა საკუთრებაში. “სოციალურ სახლებში” დამატებით 176 ბინა მოეწყობა“, აღნიშნა დავით ბალაძემ.