ბათუმის ბოტანიკური ბაღის მიმდებარედ ტურისტული ინფრასტრუქტურა შეიქმნება. როგორც აჭარის მთავრობის მეთაურმა არჩილ ხაბაძემ განაცხადა, გეგმა მთავრობას უკვე შემუშავებული აქვს და მასში მონაწილე „სამეული“ საბოლოო ჯამში კმაყოფილი დარჩება.

უკვე არსებული სქემის მიხედვით, აგრარული უნივერისტეტის ყოფილი შენობა, რომელიც ბოტანიკური ბაღი მდებარეობს და არის ამორტიზებული, თუმცა საინვესტიციოდ მიმზიდველი - გასხვისდება.

სანაცვლოდ უნივერსიტეტი მიიღებს ჩაქვში მდებარე უმაღლესი საბჭოს შენობას, ხოლო უმაღლეს საბჭო სამუშაოდ ბათუმში დაბრუნდება, რისთვისაც აჭარის მთავრობა ახალი შენობის აშენებას გეგმავს.

არჩილ ხაბაძის განმარტებით, აგრარული უნივერსიტეტის შენობა საჭიროებს რეაბილიტაციას, თუმცა თავად უნივერისტეტს ამისათვის ფინანსები არ გააჩნია.

„ინვესტორის დაინტერესების შემთხვევაში, ჩვენ მზად ვართ უნივერსიტეტს 5 ათასი კვ/მ ფართის უფრო კეთილმოწყობილი შენობა გადავცეთ, ანუ რასაც მოიცავს მთლიანობაში ყოფილი აგრარული უნივერსიტეტის შენობა.

მზად ვართ უნივერისტეტს უმაღლესი საბჭოს შენობა გადავცეთ, რომელიც განთავსებულია ჩაქვში და მოიცავს 3 ათას კვ/მ ფართს. შენობა საკმაოდ კეთილმოწყობილია და შესანიშნავი ნაგებობაა სასწავლო დაწესებულებისათვის. დამატებით, ბათუმის ტერიტორიაზე გამოვყოფთ 2 ათას კვ/მ გარემონტებულ ფართს, რომელსაც უნივერსიტეტი შემდგომ საკუთარი მიზნებისათვის გამოიყენებს.

საერთო ჯამში, ვგეგმავთ, რომ 5000 კვ/მ კეთილმოწყობილი ფართი შევთავაზოთ უნივერსიტეტს, სანაცვლოდ კი წამოვიღოთ 5000 კვ/მ ფართი - საინვესტიციო მიზნებისთვის. ამის შემდგომ გვინდა უმაღლესი საბჭოსთვის, ქალაქის ტერიტორიაზე გამოვყოთ ფართი და საბჭოს ავუშენოთ შენობა“, აღნიშნა არჩილ ხაბაძემ.

აჭარის მთავრობის თავმჯდომარე ვარაუდობს, რომ ბათუმის ბოტანიკური ბაღის მიმდებარედ ტურისტული ინფრასტრუქტურის შექმნისთვის ინვესტორი 200 მლნ-მდე ინვესტიციას განახორციელებს, ხოლო ფართს საბაზრო ღირებულებით მიიღებს.