11 მიგრანტი, რომლებიც სატვირთო ავტომობილით არალეგალურად შევიდნენ დიდი ბრიტანეთის ტერიტორიაზე, ძვირადღირებული ბელგიური შოკოლადის წყალობით გადარჩნენ. ისინი შიმშილის მოსაკლავად სწორედ ამ შოკოლადით იკვებებოდნენ. გაზეთ Telegraph-ის ცნობით, ინციდენტი უილტშირის საგრაფოში მოხდა. მძღოლებმა სატვირთოდან ხმამაღალი ყვირილი გაიგონეს, რის შემდეგაც მისაბმელის კარის გააღება სცადეს, თუმცა უშედეგოდ. მაშველებმა, რომლებმაც კარი გააღეს, სატვირთოში 11 ადამიანი აღმოაჩინეს, რომელთა შორის ერაყისა და ავღანეთის მოქალაქეები იყვნენ.  

„ადამიანთა ჯგუფი მისაბმელის შორეულ კუთხეში იყო მოთავსებული და ძალიან ძვირადღირებული ბელგიური შოკოლადით იკვებებოდა... მათ ძალიან გაუმართლათ, რადგან ამ მისაბმელში იყო მაცივარი, მაგრამ იმ სექციაში, რომელშიც ისინი იმყოფებოდნენ, ნორმალური ტემპერატურა იყო“, - განუცხადა მედიას ერთ-ერთმა თვითმხილველმა.

მისი თქმით, კონტრაბანდისტებმა, რომლებიც ორგანიზებას უკეთებენ მიგრანტების არალეგალურ გადაყვანას, ხშირად აზიანებნ სატვირთოების ბოქლომებს, რათა მისი გახსნა სხვა სახელმწიფოებში ვერ შეძლონ.

მიგრანტებს სამედიცინო კვლევა ჩაუტარდათ, რის შემდეგაც გაერთიანებული სამეფოს ტერიტორიაზე უკანონოდ შესვლისთვის დააკავეს.