სოსო რობაქიძე, რომელიც მისი შვილის საქმეზე სასამართლო პროცესიდან ხმაურისა და შეძახილების გამო გააძევეს, სხდომებზე დასწრებას კვლავ შეძლებს. მან მოსამართლე დავით მგელიაშვილს წერილით მიმართა, სადაც ითხოვს, რომ სხდომებზე დასწრების ნება დართონ იმ პირობით, რომ სიმშვიდეს შეინარჩუნებს.

მოსამართლემ განმარტა, რომ სხდომაზე გაძევებული პირის დაშვება მხოლოდ რომელიმე მხარის შუამდგომლობით დაიშვება და არა თავად გაძევებულის თხოვნით. მოსამართლის ამ განცხადების შემდეგ პროცესებზე სოსო რობაქიძის დაშვების შუამდგომლობა პროკურორებმა დააყენეს. ამ შუამდგომლობას ბრალდებულები და მათი ადვოკატებიც დაეთანხმნენ იმ არგუმენტით, რომ რობაქიძეს ამით საშუალება ექნება მკვლელობის ღამეს მომხდარი რეალური ფაქტები ნახოს.

თბილისის საქალაქო სასამართლოში ბუტა რობაქიძის მკვლელობის საქმის ფიგურანტების პროცესი მიმდინარეობს. საქმე ეხება რობაქიძის სიცოცხლის მოსპობისას შინაგან საქმეთა სამინისტროს მაღალჩინოსნების მხრიდან უფლებამოსილების გადამეტების ეპიზოდს.