„ქართული ოცნება“ დღე და ღამე ღმერთზე ლოცულობს და ამ მარხვაში გინება როგორ შეიძლება, - ამის შესახებ  „ნაციონალური მოძრაობის“ წევრმა, რომან გოცირიძემ განაცხადა. მისივე თქმით, ენმ მთავრობის ახალ შემადგენლობას მხარს არ დაუჭერს.

,,არ ყოფილა ერთი მიმართულება, სადაც ჩვენ შეგვიძლია ვთქვათ, რომ რაიმე წინსვლა ჰქონდა ამ მთავრობას. ერთი მაგალითიც არაა, რომ გაუმჯობესდა მატერიალური, ან სულიერი, ან პოლიტიკურ– ფილოსოფიური ყოფა. სასამართლო სისტემა მოიშალა, საზღვრები მორღვეულია, ტერორისტები შემოდიან, ადამიანებს იტაცებენ და გადაყავთ აზერბაიჯანში, ნარკოტიკებს უდებენ ახალგაზრდებს, ეკონომიკა დეგრადირებულია, ფასები და სიღარიბე იზრდება, ლარი გაუფასურებულია, კონსტიტუცია თავზე გადაგვახიეს. შარშან ამ დროს, როდესაც ამ მთავრობას ვამტკიცებდით, საქართველოს მოსახლეობა ირჩევდა პრეზიდენტს, დღეს პრეზიდენტის არჩევის უფლებაც არ გვაქვს. ბუნებრივია, რომ მათ მხარს არ დავუჭერთ და გავაკრიტიკებთ. კრიტიკას უნდა მოსმენა და როგორი გამაღიზიანებელიც არ უნდა იყოს, არ უნდა შეაგინო ოპონენტებს. ეს ჩვენი „ქართული ოცნება“ დღე და ღამე ღმერთზე ლოცულობს, დილით ღმერთზე ფიქრობენ და ღამით ანგელოზები ესიზმრებათ და ამ მარხვაში გინება როგორ შეიძლება, თანაც ჯერ სამარხვო გინება არ არის გამოგონებული”, - განაცხადა რომან გოცირიძემ ჟურნალისტებთან საუბარში.