ქუთაისის ნიკო ნიკოლაძის სახელობის სკოლა-ლიცეუმში მუსტაფა ემრე ჩაბუქის ადვოკატი ვახტანგ კვიჟინაძე მედიის წარმომადგენლებს შეხვდა. ჩაბუქი 5 წლის განმავლობაში სწორედ ამ სკოლა ლიცეუმის დირექტორი იყო. როგორც ადვოკატი, ვახტანგ კვიჟინაძე აცხადებს, ჩაბუქის ბრალდება - ტერორისტულ ორგანიზაციებთან კავშირი, არ დასტურდება.

„შემოწმდა სკოლები, რომელთაგანაც საქართველოს ფარგლებს გარეთ ერთი თეთრიც არ გადარიცხულა და დივიდენტის სახით არ გასულა. თანხები არამხოლოდ თურქეთის რესპუბლიკაში, არამედ, პარტნიორებთანაც კი არ გატანილა. შესაბამისად, ის ტერორისტული ორგანიზაციას დახმარების ვერ გაუწევდა. სახელმწიფო ბრალდება ედავება, რომ ტერორისტული ორგანიზაციის წევრი იყო. ჩვენ კი ვსვამთ კითხვას, რაში გამოიხატებოდა მისი წევრობა? გარდა ამისა, სკოლები შეფასებულია, როგორც ტერორისტული ორგანიზაციის შემადგენელი ნაწილი. რაში გამოიხატება ეს? თანხა გაცემული არ არის, დამფუძნებელი გიულენი არ არის, აღნიშნული პირის კავშირი გიულენთან საქმეში არ არსებობს. ჩაბუქი კოლეჯების მესაკუთრე არ ყოფილა, ის იყო დაქირავებული თანამშრომელი, მენეჯერული ფუნქციებით აღჭურვილი“, - განაცხადა ადვოკატმა.

მისივე თქმით, 24 თებერვალს ჩანიშნულ პროცესამდე ან  ჩაბუქის გათავისუფლება გადაწყდება ან  მისი ექსტრადირება.

„პროცესი 24 თებერვალს არის ჩანიშნული, ამ თარიღამდე გადაწყვეტილი უნდა იყოს მისი ან გამოშვება და საქმის გაგრძელება მისი გარეთ ყოფნის პერიოდში ან ექსტრადირება და თურქეთისთვის გადაცემა“, - განაცხადა ჩაბუქის ადვოკატმა.

შეგახსენებთ, დემირელის კერძო კოლეჯის ხარისხის მართვის მენეჯერი, მუსტაფა ემრე ჩაბუქი 24 მაისს, თბილისში, თურქეთის მხარის მოთხოვნით დააკავეს. თბილისის საქალაქო სასამართლომ მუსტაფა ემრე ჩაბუქს 25 მაისს, სამთვიანი წინასაექსტრადიციო პატიმრობა შეუფარდა, რომელიც 25 ნოემბერს კიდევ 3 თვით გაუხანგრძლივდა. ჩაბუქსა და მის ოჯახს 7 ივლისს, საქართველოს ლტოლვილთა და იძულებით გადაადგილებულ პირთა სამინისტრომ მხრიდან, უარი უთხრა ლტოლვილის სტატუსის მინიჭებაზე.