,,ევროპული საქართველო” პანკისში ჩატარებული სპეცოპერაციის შესახებ დეტალების გასაჯაროვებას მოითხოვს. ირმა ნადირაშვილი აცხადებს, რომ პარტიაში ამბობენ, რომ აუცილებელია, ხელისუფლებამ საზოგადოებას მიაწოდოს ინფორმაცია, თუ რით დასტურდება 19 წლის ახალგაზრდის კავშირი ჩატაევთან და სირიასთან.

ოპოზიციურ პარტიაში ამბობენ, რომ იმ შემთხვევაში, თუ ხელისუფლება თავს აარიდებს პასუხებს და საზოგადოებას არ მიაწვდია საჭირო ინფორმაციას, სიტუაცია კიდევ უფრო დამძიმდება.

26 დეკემბერს, საქართველოს სახელმწიფო უსაფრთხოების სამსახურის წარმომადგენლებმა პანკისის ხეობასა და თბილისში დააკავეს 5 პირი, რომლებსაც ბრალად ედება 21-22 ნოემბერს, თბილისში ჩატარებული კონტრტერორისტული ოპერაციისას განეიტრალებული ახმედ ჩატაევისა და მისი თანამზრახველების ხელშეწყობა. სპეცოპერაციისას სამართალდამცავებმა თავის არეში დაჭრეს სოფელ დუისის მკვიდრი, თემირლან მაჩალიკაშვილი, რომელმაც სახელმწიფო უსაფრთხოების სამსახურის ინფორმაციით, ხელყუმბარის აფეთქება სცადა. ამ ინფორმაციას უარყოფენ მაჩალიკაშვილის ოჯახის წევრები, რომლებიც სამართალდამცავებს ადანაშაულებენ ძალის გადამეტებაში. 26 დეკემბერს, თემირლან მაჩალიკაშვილს თელავის საავადმყოფოში ოპერაცია გაუკეთეს და მისი მდგომარეობა მძიმეა.