საზოგადოებრივი მაუწყებლის მიერ პოეტ ზვიად რატიანის დაკავების საქმეზე შინაგან საქმეთა სამინისტროს ჩანაწერის გავრცელებას სამოქალაქო პროტესტი მოჰყვა.

მოქალაქეები, მათ შორის მწერლები ლაშა ბუღაძე, რატი ამაღლობელი, ნენე კვინიკაძე, არჩილ ქიქოძე, გიორგი მაისურაძე, პაატა შამუგია და სხვები ფეისბუკის საკუთარ გვერდებზე წერენ, რომ მაუწყებელს ბოიკოტს უცხადებენ, რადგან მიიჩნევენ, რომ დამონტაჟებული კადრების გავრცელება, სადაც არ ჩანს მოქალაქის დაკავების მომენტი, რატიანის დისკრედიტაციას ისახავს მიზნად.

,,მე, როგორც საზოგადოების ერთი რიგითი წევრი, ბოიკოტს ვუცხადებ ანტისაზოგადოებრივ მაუწყებელს! ჟურნალისტებისადმი სიმპათიის მიუხედავად, სანამ ეს ანტისაზოგადოებრივი შანტრაპა გააგრძელებს თავის წამქეზებლურ და სიმულაციურ საქმიანობას, როგორც რესპოდენტი ერთმნიშვნელივნად ვწყვეტ ამ ტელევიზიასთან თანამშრომლობას. ასე არ გამოვა, მეგობრებო, ერთი მხრივ პოეტის ლექსებს ციტირებდე და მეორე მხრივ, საჯიჯგნად და საგინებლად სწირავდე ამავე ადამიანს! ბოიკოტი ანტისაზოგადოებრივ მაუწყებელს!”, - წერს ლასა ბუღაძე.

თავად ზვიად რატიანი სამართალდამცავებს ცემაში ადანაშაულებს. პოლიციელების მიერ უფლებამოსილების შესაძლო გადამეტების ფაქტს პროკურატურა იძიებს. საზოგადოებრივი მაუწყებლის პირველმა არხმა გამოითხოვა და გაავრცელა შსს-ის მუშაკების მიერ გადაღებული ვიდეომასალა, რომელშიც ასახავს ნასვამ მდგომარეობაში მყოფი რატიანის მხრიდან გინებას. ვიდეო მოსამართლემ მტკიცებულებად დაურთო საქმის მასალებს, რაც რატიანის დაცვისთვის მიუღებელია - ადვოკატი აცხადებს, რომ ვიდეო არ ასახავს რატიანის გაჩერების და დაკავების მომენტებს და არის გადაღებული ტელეფონით, მაშინ, როცა სამართალდამცველებს საპოლიციო კონტროლის დროს აკისრიათ სამხრე კამერების ჩართვის ვალდებულება.