მთავრობა აჭარაში საკრუიზო ტურიზმის განვითარებისთვის აქტიურ მუშაობას იწყებს. აღნიშნულ საკითხზე იმსჯელეს დღეს აჭარის მინისტრთა კაბინეტშიც, სადაც საკრუიზო ტურიზმის სტრატეგიის ასამოქმედებლად გასატარებელი რიგი ღონისძიებები დაიგეგმა.

როგორც აჭარის ტურიზმის დეპარტამენტის ხელმძღვანელი მამუკა ბერძენიშვილი განმარტავს, ბათუმში საკრუიზო გემების მისაღებად შესაბამისი ინფრასტრუქტურა უნდა შეიქმნას და მოხდეს ბათუმის პორტის გაერთიანება საკრუიზო საერთაშორისო ორგანიზაციებში.

„საკრუიზო ტურიზმის განვითარებისთვის აუცილებელია ბათუმის პორტისა და აჭარის მთავრობის ჩართულობა. პორტმა თავის მხრივ უნდა განახორციელოს ინფრასტრუქტურული პროექტები, ხოლო მთავრობამ ტურიზმის დეპარტამენტის მეშვეობით, საკუთარ თავზე უნდა აიღოს რეკლამა და ზოგადად მარკეტინგული ღონისძიებების განხორციელება.

უფრო კონკრეტულად კი პორტმა მე-10 და მე-11 ნავმისადგომის რეაბილიტაცია უნდა მოახდინოს და განახორციელოს ასევე საოპერაციო საქმიანობის მოდერნიზაცია. რაც საბოლოო ჯამში ჩვენ 300 მეტრზე მეტი სიგრძის გემების მიღების საშუალებას მოგვცემს“, აღნიშნა მამუკა ბერძენიშვილმა.

როგორც აჭარის ტურიზმის დეპარტამენტის ხელმძღვანელი განმარტავს, მოლაპარაკებები ბათუმის პორტის მენეჯმენტთან უკვე დაწყებულია.

„მეორეს მხრივ, ჩვენ უნდა ვუზურნელყოთ შავ ზღვაზე კონკრეტული საკომუნიკაციო პლათფორმის შექმნა. ამ შემთხვევაში ასოციაციის სახით რაც საშუალებას მოგვცემს ბათუმის და ზოგადად შავი ზღვის საკრუიზო მიმართულების პოზიოციონირება მოვახდინოთ“, განმარტა მამუკა ბერძენიშვილმა.

მისივე ინფორმაციით, უნდა მოხდეს ასევე მარკეტინგის მენეჯერის დაქირავება, რომელიც დასავლეთის ბაზრებზე ბათუმისა და შავი ზღვის პოზიციონირებას მოახდენს.