ფრანგმა პოლიციელებმა პარიზის სასტუმრო Ritz-ის საიუველირო მაღაზიიდან მოპარული ძვირფასეულობისა და ძვირფასი საათების ნაწილი იპოვეს.

მედიის ცნობით, მოპარული სამკაულები იმ ადგილის სიახლოვეს იპოვეს, სადაც ძარცვა მოხდა. სავარაუდოდ ის მძარცველმა გაქცევის დროს დაკარგა.

მედიისვე ცნობით, პარიზიდან 15 კმ-ში პოლიციელებმა აღმოაჩინეს დამწვარი ავტომობილი, რომლითაც სავარაუდოდ კიდევ ერთი მძარცველი მიიმალა.

გავრცელებული ინფორმაციით, ხუთმა ნაჯახებით შეიარაღებულმა პირმა სასტუმროში განთავსებული საიუველირო მაღაზიის ვიტრინა გატეხა და 4 მლნ ევროს ღირებულების ძვირფასეულობა გაიტაცა.

ძარცვის შემდეგ პოლიციამ მალე სამი მამაკაცი დააკავა, ორმა კი მიმალვა მოასწრო.

პარიზის იმ რაიონში, სადაც სასტუმრო Ritz-ი და იუსტიციის სამინისტრო მდებარეობს, 2014 წელს საიუველირო მაღაზიების თავხედური ძარცვის სერია მოხდა, რის შემდეგაც ამ რაიონში უსაფრთხოების ზომები გამკაცრდა.