NDI-ის კვლევა კიდევ ერთხელ ადასტურებს, რომ ენმ მთავარ ოპოზიციურ ძალად რჩება - ამის შესახებ „ნაციონალური მოძრაობის“ წევრმა თინა ბოკუჩავამ განაცხადა. 

„კვლევა, რომელიც NDI-მ გამოაქვეყნა, კიდევ ერთხელ ადასტურებს, იმას, რომ „ნაციონალური მოძრაობა“ ქვეყანაში მთავარი ოპოზიციური ძალაა. კვლევა ასევე აჩვენებს იმას, რომ დღითიდღე მეტი ადამიანი შორდება „ქართულ ოცნებას“, რადგან ამ ძალას არ შეუძლია მოაგვაროს ყოველდღიური პრობლემები. ისინი ვერ დაძლევენ უმუშევრობას, ეკონომიკურ პრობლემებს, ინფლაციას, „ნაციონალური მოძრაობა“ კი ყველაფერს გააკეთებს, რომ მჭიდროდ იმუშაოს ხალხთან. ჩვენ ერთადერთი პროფესიონალების გუნდი ვართ, რომელმაც ერთხელ უკვე აჩვენა, რომ შეგვიძლია ქვეყნის სწორ გზაზე დაყენება, ჩვენი ქვეყნის განვითარების და ეკონომიკური წინსვლის უზრუნველყოფა. ასე რომ, მე იმედი მაქვს, ჩვენი ქვეყნის მოსახლეობის დიდი ნაწილი შემოგვიერთდება იმისთვის, რომ კიდევ ერთხელ წავიყვანოთ წინ ჩვენი ქვეყანა და გადავჭრათ ის პრობლემები, რაც მოსახლეობის უდიდეს ნაწილს აწუხებს“, - განაცხადა თინა ბოკუჩავამ. 

NDI-ის კვლევის მიხედვით, გამოკითხულთა შეხედულებებთან ყველაზე ახლოს ”ქართული ოცნება” დგას. კითხვაზე, რომელი პარტია დგას ჩვენს შეხედულებებთან ყველაზე ახლოს, პასუხები ასე გადანაწილდა:

”ქართული ოცნება”– 31%, არც ერთი პარტია - 30%, უარი პასუხზე - 12%, ”ნაციონალური მოძრაობა”- 10%, არ ვიცი - 5%, ”ევროპული საქართველო”- 4%, ”პატრიოტთა ალიანსი”- 3%, სხვა - 1%.

კვლევის საველე სამუშაოები ჩატარდა 29 ნოემბერი-19 დეკემბრის პერიოდში, საქართველოს მასშტაბით (ოკუპირებული ტერიტორიების გამოკლებით), 2,298 პირისპირ ინტერვიუს წარმომადგელობითი შერჩევის საფუძველზე.

NDI-ის კვლევები ხორციელდება დიდი ბრიტანეთის მთავრობის UK aid-ის ფინანსური ხელშეწყობით. გამოკითხვას ატარებს CRRC-საქართველო. საშუალო ცდომილების ზღვარი არის +/- 1.9%.