სირიის აფრინში თურქეთის ავიაიერიშებს, საარტილერიო და სარაკეტო დარტყმებს რვა მშვიდობიანი მოქალაქე ემსხვერპლა. ამის შესახებ სირიელი ქურთების შეიარაღებული ძალების წარმომადგენელმა ბირუსუკ  ჰასაკმა განაცხადა.

სირიელი უფლებადამცველების თქმით, გარდაცვლილები ერთი ოჯახის წევრები იყვნენ. დამკვირვებელთა მონაცემებით, აფრინში თურქეთის მხარის ქმედებების შედეგად სულ 11 მშვიდობიანი მცხოვრები დაიღუპა.

თურქეთის საგარეო საქმეთა მინისტრმა მევლუთ ჩავუშოღლუმ მშვიდობიანი მოქალაქეების დაღუპვის ფაქტი უარყო.  

თურქეთმა აფრინში სირიელი ქურთების შეიარაღებული რაზმების წინააღმდეგ ოპერაცია „ზეთისხილის რტო“ დაიწყო. რეგიონში მან ავიაერიშები და საარტილერიო დარტყმები განახორციელა.

 გუშინ კი ოპერაცია სახმელეთო ფაზაში გადავიდა, რომელშიც ტანკები და ჯავშანტექნიკა მონაწილეობს. მშვიდობიანი მოქალაქეები საბრძოლო მოქმედების ზონას უკვე ტოვებენ. ნაწილი თელ-აჯარის, ნაწილი კი ალეპოს მიმართულებით გადაადგილდება.

საფრანგეთის საგარეო საქმეთა მინისტრის ჟან-ივ ლე დრიანის თქმით, გაეროს უშიშროების საბჭო სირიაში არსებულ სიტუაციას ორშაბათს განიხილავს.