ლეიკემიით დაავადებულმა გოგონამ თავის თავზე იქორწინა.
21 წლის იანგ ჩუნიანმა თავისი დიაგნოზის შესახებ ერთი თვის წინ შეიტყო.

თავისი სურვილის შესახებ გოგონამ ძმას უამბო, რომელიც მის სანახავად საავადმყოფოში მივიდა. ჩუნიანმა ძმას გაანდო, რომ ყოველთვის ოცნებობდა საქორწინო კაბაზე და ახლა დაავადების გამო ეშინოდა, რომ კაბას ვეღარასდროს ჩაიცვამდა.

გოგონას ძმამ დასახმარებლად ვოლონტერებს მიმართა, რომლებმაც საავადმყოფოში საქორწინო ცერემონია გამართეს. შენობის ჰოლში დააგეს ვარდისფერი ხალიჩა, რომელზეც მარტოხელა პატარძალმა საქორწინო კაბით გაიარა, ხელში კი ულამაზესი თაიგული ეჭირა. ცერემონიაზე საქორწინო ტორტიც გაიჭრა.

ცერემონიის შემდეგ ჩუნიანმა ხელი მოაწერა საბუთებს, რომლის თანახმად, თავის ორგანოებს გადანერგისთვის ტოვებს.

„მე უამრავი კეთილი ადამიანი მეხმარება. მათი წყალობით, იმედი დავინახე და უფრო ძლიერი გავხდი. არ არის მნიშვნელოვანი გამოვჯანმრთელდები თუ არა, - მე არ მეშინია“, - განაცხადა ჩუნიანმა.