ერთი წლის წინ, 2017 წლის 2 თებერვალს ევროპარლამენტმა პლენარულ სხდომაზე საქართველოს მოქალაქეებისთვის უვიზო მიმოსვლას საბოლოოდ დაუჭირა მხარი. 
რაც შეეხება, უვიზო მიმოსვლის შემოღებასთან დაკავშირებულ რეგულაციასა და განახლებულ შეჩერების მექანიზმს, ევროპარლამენტის პრეზიდენტმა და ევროკავშირის საბჭოს თავმჯდომარე ქვეყნის წარმომადგენელმა ხელი ოფიციალურად პირველ მარტს მოაწერეს.
2017 წლის 8 მარტს კი ევროკავშირის ოფიციალურ ჟურნალში გამოქვეყნდა ევროკავშირის საბჭოს N539/2001 რეგულაციის ცვლილება, რომლის თანახმად, საქართველომ ევროკავშირთან უვიზო მიმოსვლის რეჟიმის მქონე ქვეყნების სიაში გადაინაცვლა.
დოკუმენტის ხელმოწერის შემდეგ, გასული წლის 28 მარტს,  შენგენის ზონის ქვეყნებში საქართველოს მოქალაქეებისთვის უვიზო მიმოსვლა ამოქმედდა. ერთ-ერთი პირველი, ვინც ევროპაში უვიზოდ გაემგზავრა საქართველოს პრემიერმინისტრი გიორგი კვირიკაშვილი იყო. 
უვიზოდ მოგზაურობა შესაძლებელია შენგენის ზონის ტერიტორიაზე, რომელიც მოიცავს ევროკავშირის 22 წევრ ქვეყანას, ევროკავშირის 4 არაწევრ ქვეყანას. უვიზო მიმოსვლა ასევე შესაძლებელია შენგენის 4 კანდიდატ ქვეყანასთან:

ევროკავშირის წევრი შენგენის სივრცის ქვეყნები: ავსტრია, ბელგია, გერმანია, დანია, ესპანეთი, ესტონეთი, იტალია, ლატვია, ლიტვა, ლუქსემბურგი, მალტა, ნიდერლანდები, პოლონეთი, პორტუგალია, საბერძნეთი, საფრანგეთი, სლოვენია, სლოვაკეთი, უნგრეთი, ფინეთი, შვედეთი, ჩეხეთი.
ევროკავშირის არაწევრი შენგენის სივრცის ქვეყნები: ისლანდია, ლიხტენშტეინი, ნორვეგია და შვეიცარია;
ევროკავშირის წევრი შენგენის კანდიდატი ქვეყნები: ბულგარეთი, კვიპროსი, რუმინეთი, ხორვატია;
გამონაკლისს წარმოადგენს ევროკავშირის 2 წევრი ქვეყანა: დიდი ბრიტანეთი და ირლანდია
ამ ქვეყნების ვიზის მისაღებად საქართველოს მოქალაქეებმა უნდა მიმართონ შესაბამის საკონსულო სამსახურებს:
ევროკავშირთან უვიზო რეჟიმის პირობებში საქართველოს მოქალაქეებს ვიზის გარეშე შეუძლიათ გაემგზავრონ მხოლოდ მოკლევადიანი ვიზიტით ევროკავშირის/შენგენის წევრ ქვეყნებში;
მოკლევადიანი ვიზიტი გულისხმობს 90 დღეს ნებისმიერი 180 დღის განმავლობაში. 

180 დღიდან 90 დაშვებული დღის გამოყენება შეიძლება გადაბმულად ან დღეების გადანაწილებით.

უვიზოდ მოგზაურობის წესების შესახებ ინფორმაცია, უფრო დეტალურად, იხილეთ საქართველოს საგარეო საქმეთა სამინისტროს ოფიციალურ გვერდზე: გზამკვლევი ევროკავშირის/შენგენის სივრცეში უვიზო მიმოსვლისთვის

ევროკავშირის საბჭოს სავიზო ჯგუფის შეხვედრაზე, რომელიც 2018 წლის 23 იანვარს გაიმართა, შვედეთმა და ისლანდიამ საქართველოდან თავშესაფრის მაძიებელთა რაოდენობის საგრძნობი ზრდის შესახებ დააყენეს საკითხი, თუმცა, ევროკავშირის არც ერთ ქვეყანას მოუთხოვია საქართველოსთან უვიზო მიმოსვლის შეჩერება. ევროკავშირში საქართველოს ელჩის, ნატალი საბანაძის განცხადებით, საქართველოს მოქალაქეებისთვის უვიზო რეჟიმის შეჩერების მექანიზმის ამოქმედებაზე საუბარი ჯერჯერობით არ არის.

თავშესაფრის მინიჭების ევროპული სააგენტოს მონაცემებით, 2017 წელს,  2016 წელთან შედარებით ევროკავშირის წევრ ქვეყნებში თავშესაფრის მაძიებელი საქართველოს მოქალაქეების რიცხვი 35%-ით გაიზარდა.

დღეს, 2018 წლის 2 თებერვალს, საგარეო საქმეთა მინისტრმა, მიხეილ ჯანელიძემ, საქართველოს მოქალაქეებს მოუწოდა, ვიზალიბერალიზაციის შესაძლებლობას გაუფრთხილდნენ.

მინისტრის შეფასებით, საქართველოს მოქალაქეებს ვიზალიბერალიზაციით სარგებლობის კუთხით დღეს არანაირი საფრთხე არ ემუქრებათ.