ბაქოს მმართველი რეჟიმი რასისტული ბუნების დემონსტრაციას ახდენს, - ასე ეხმაურება სომხეთის საგარეო საქმეთა სამინისტრო აზერმაიჯნის პრეზიდენტ ილჰამ ალიევის განცხადებას, რომლის თანახმადაც ერევანი აზერბაიჯანის ისტორიული ტერიტორიაა.

"აზერბაიჯანის პრეზიდენტის განცხადება, რომელიც სომხეთთან მიმართებაში ტერიტორიულ პრეტენზიებს ეხება, პრეზიდენტის იმ ქვეყნისა, რომელიც მსოფლიო პოლიტიკურ რუკაზე სულ რაღაც 100 წლის წინ გამოჩნდა, სიახლე არაა. ამით აზერბაიჯანი, ბაქოს მმართველი რეჟიმის რასისტული ბუნების დემონსტრაციას ახდენს", - აცხადებს სომხეთის საგარეო საქმეთა სამინისტროს პრესმდივანი ტიგრან ბალაიანი.

8 თებერვალს აზერბაიჯანის პრეზიდენტმა ილჰამ ალიევმა განაცხადა, რომ მისი ქვეყნის მაცხოვრებლები ისტორიულ ტერიტორიებზე დაბრუნებისკენ უნდა მიისწრაფოდნენ. ტერიტორიებს შორის კი მეზობელი სომხეთის დედაქალაქი ერევანიც მოიხსენია.

"მინდა აღვნიშნო, რომ არ უნდა დავივიწყოთ ჩვენი ისტორიული ტერიტორიები. სამომავლოდ ეს ჩვენი საქმიანობის ერთ-ერთი წამყვანი საკითხი უნდა გახდეს. ჩვენი ისტორიული მიწებია ერევნის სახანო, ზანგიზური და სხვა. ამის შესახებ უნდა იცოდეს როგორც ჩვენმა მომავალმა თაობამ, აგრეთვე მთელმა მსოფლიომ", - თქვა ალიევმა.