გორში მამაკაცის დაჭრაში ბრალდებული დააკავეს
გორის ცენტრში 30 წლამდე მამაკაცის დაჭრაში ბრალდებული დააკავეს. ის ამ წუთებში პოლიციელების კითხვებს პასუხობს.
დაჭრილს ამ დროისთვის ოპერაცია ჩაუტარდა. ექიმის თქმით, პაციენტის სიცოცხლეს საფრთხე არ ემუქრება. ახალგაზრდა მამაკაცს გულ-მკერდის არეში მრავლობითი ჭრილობები, სავარაუდოდ, დანით ჰქონდა მიყენებული.
ცნობისთვის, ის გვიან ღამით უგონო მდგომარეობაში, სტალინის გამზირზე გამვლელებმა შენიშნეს. მათვე გამოიძახეს საპატრულო პოლიცია და სასწრაფო სამედიცინო დახმარების ჯგუფი.
შსს-მ გამოძიება განზრახ მკვლელობის მცდელობის მუხლით დაიწყო.
