რეგიონული განვითარებისა და ინფრასტრუქტურის სამინისტროს შ.პ.ს. „სახელმწიფო სამშენებლო კომპანია“ მდინარე ბჟუჟზე რკინა-ბეტონის დამცავი კედელის მშენებლობას ასრულებს.

ბჟუჟის ადიდებამ 2014 წლის სექტემბერის ბოლოს გურიას, მხარის ინფრასტრუქტურასა და მოსახლეობას, 3 მილიონ 24 ათასი ლარის ზარალი მიაყენა. დამცავი კედელი ბჟუჟის კალაპოტში იმ ადგილას შენდება, სადაც ადიდებულმა წყალმა,  ოზურგეთი-შემოქმედი-ბჟუჟჰესი-გომის მთას ცენტრალური მაგისტრალის მე-4 კილომეტრზე, 70 მეტრი საავტომობილო გზა ჩაანგრია და მოძრაობა შეაჩერა.

მდინარის ერთ ნაწილში უკვე აშენებულია რკინა-ბეტონის დამცავი კედელი, რომლის სიმაღლე 7,20 მეტრი, ხოლო სიგრძე 594 მეტრია;  ბჟუჟის ნაპირგამაგრების სამუშოები, ასევე, მოიცავს მდინარის მეორე ნაწილში 170 მეტრი სიგრძისა და 8,5 მეტრი სიმაღლის რკინა-ბეტონის დამცავი კედლის მშენებლობას, გაბიონის მშენებლობას და ასფალტის დაგებას წყალდიდობით დაზიანებულ გზის მონაკვეთზე. ამასთან, ბჟუჟზე გაიწმინდა, გაფართოვდა და გაღრმავდა კალაპოტი; წყლის შესაკავებლად მოეწყო რამდენიმე დროებითი დამბა, ჩაიდო ტეტრაპოდები.

ოზურგეთი-შემოქმედი-ბჟუჟჰესი-გომის მთას ცენტრალური საავტომობილო გზით გურიის 7 სოფლის (შემოქმედი, კვირიკეთი, წითელმთა, გონებისკარი, გომი, ბოხვაური, კურორტიგომისმთა) მოსახლეობა სარგებლობს. ნაპირდამცავი სამუშაოების დასრულების შემდეგ, გზაზე გადაადგილება მათთვის, ინტენსიური წვიმების დროსაც კი, უსაფრთხო იქნება.

სტიქიის შედეგების ლიკვიდაციისა და ნაპირგამაგრების სამუშაოებზე, რომელიც სახელმწიფო ბიუჯეტის დაფინანსებით 6 მილიონილარი დაჯდა, 45 ადამიანია დასაქმებული.