სრულიად საქართველოს კათოლიკოს-პატრიარქმა და ბიჭვინთა-ცხუმ-აფხაზეთის მიტროპოლიტმა ილია მეორემ ინდოეთის პრემიერ-მინისტრს ქეთევან დედოფლის წმინდა ნაწილების საქართველოში დარჩენის ვადის გახანგრძლივებას სთხოვს.

 „ჩვენი ხალხი დიდი სიყვარულით შეხვდა თავის დედოფალს, მისი წმ. ნეშტის ნაწილების მსვლელობა საქართველოს სხვადასხვა კუთხეში დღემდე გრძელდება, მაგრამ ვინაიდან ეს დრო საკმარისი არ აღმოჩნდა მრევლის მასთან მიახლებისთვის, გთოვთ, განხილულ იქნას სიწმინდეების საქართველოში ყოფნის ვადის გაგრძელება თუნდაც ექვსი თვით“ - აღნიშნულია პრემიერ მინისტრ ნარენდრა მოდისადმი გაგზავნილ წერილში, რომელიც საპატრიარქოს ოფიციალურ ვებგვერდზე გამოქვეყნდა.

ქეთევან დედოფლის წმინდა ნაწილები საქართველოში 2017 წლის 23 სექტემბერს საპატრიარქოს, კულტურისა და ძეგლთა დაცვისა და საგარეო საქმეთა სამინისტროების ერთობლივი ძალისხმევის შედეგად ინდოეთიდან ჩამოაბრძანეს.