ვენეციის კომისია საქართველოს საკონსტიტუციო ცვლილებებთან დაკავშირებით დღეს საბოლოო დასკვნას წარადგენს.

კომისიის 114-ე პლენარულ სხდომას საქართველოს პარლამენტის ევროპასთან ინტეგრაციის კომიტეტის თავმჯდომარე, თამარ ხულორდავა დაესწრება.

ხულორდავას განცხადებით, მას შემდეგ, რაც მომავალ კვირას საქართველოს პარლამენტი მესამე მოსმენით უყრის კენჭს საკონსტიტუციო ცვლილებებს, საქართველოს ექნება ახალი კონსტიტუცია, რომელიც სრულად შეესაბამება ფუნდამენტურ კონსტიტუციურ პრინციპებსა და ევროპული საპარლამენტო დემოკრატიის საუკეთესო ტრადიციებს.

„ვენეციის კომისია პლენარულ სხდომაზე განიხილავს და მიიღებს საბოლოო დასკვნას საქართველოს საკონსტიტუციო ცვლილებების შესახებ. ვენეციის კომისიის ექსპერტები კიდევ ერთხელ უსვამენ ხაზს, რომ საკონსტიტუციო ცვლილებები ქვეყნის კონსტიტუციური წყობის გაძლიერებასა და განვითარებას ემსახურება და რომ საკონსტიტუციო რეფორმა ასრულებს საქართველოში საპარლამენტო დემოკრატიის ფორმირების პროცესს.

საქართველოს პარლამენტის თავმჯდომარემ საკონსტიტუციო რეფორმის პროცესის დასაწყისშივე განაცხადა, რომ სრულად გავითვალისწინებდით ვენეციის კომისიის ყველა პრინციპულ რეკომენდაციას. ეს პირობა შესრულებულია. მას შემდეგ, რაც მომავალ კვირას საქართველოს პარლამენტი მესამე მოსმენით უყრის კენჭს საკონსტიტუციო ცვლილებებს, საქართველოს ექნება ახალი კონსტიტუცია, რომელიც სრულად შეესაბამება ფუნდამენტურ კონსტიტუციურ პრინციპებსა და ევროპული საპარლამენტო დემოკრატიის საუკეთესო ტრადიციებს“, – განაცხადა ხულორდავამ.