საქართველოს პრეზიდენტი გიორგი მარგველაშვილი მის აღმატებულება მაურისიო მაკრის არგენტინის რესპუბლიკის პრეზიდენტად არჩევას ულოცავს

„თქვენო აღმატებულებავ, მაქვს პატივი მოგილოცოთ მიმდინარე წლის 22 ნოემბერს გამართულ საპრეზიდენტო არჩევნებში გამარჯვება. თქვენი ქვეყნისათვის ამ ახალ, მნიშვნელოვან ეტაპზე მსურს გისურვოთ წარმატება თქვენს წამოწყებებში ქვეყნისა და ხალხის საკეთილდღეოდ. დარწმუნებული ვარ, თქვენი საქმიანობა მნიშვნელოვნად შეუწყობს ხელს არგენტინის როგორც რეგიონული, ისე გლობალური მოთამაშის როლის გაზრდას.

მსურს ხაზგასმით აღვნიშნო, რომ საერთო ღირებულებები წარმოადგენს ჩვენს ქვეყნებს შორის არსებული კეთილმეგობრული ურთიერთობებისა და თანამშრომლობის გაღრმავების მყარ საფუძველს. ამ მხრივ, მსურს  დაგიდასტუროთ ორმხრივი თანამშრომლობის განმტკიცებისადმი ერთგულება და მზადყოფნა, რაც ჩვენს ხალხთა კეთილდღეობას მოემსახურება.

ბატონო პრეზიდენტო, კიდევ ერთხელ გილოცავთ ამ  გამარჯვებას და ვუსურვებ მოძმე  არგენტინელ  ხალხს მშვიდობასა და  კეთილდღეობას.

თქვენო აღმატებულებავ, ნება მიბოძეთ დაგიდასტუროთ ჩემი ღრმა პატივისცემა", - აღნიშნულია საქართველოს პრეზიდენტის ოფიციალური მილოცვის წერილში.