ხორავას ქუჩაზე მომხდარი მკვლელობის საქმის ფარგლებში მოწმეზე ზემოქმედების ბრალდებით დაკავებულ მერაბ მორჩაძე თბილისის საქალაქო სასამართლომ პატიმრობაში დატოვა. 

ბრალდების მხარე მორჩაძის პატიმრობაში დატოვებას უალტერნატივოდ მოითხოვდა. როგორც პროკურორმა ლია ჩადუნელმა პროცესზე განაცხადა, მორჩაძე წარსულში 2-ჯერ არის ნასამართლევი. შესაბამისად, ბრალდების მხარე აპელირებდა, რომ არსებობდა საფრთხე ახალი დანაშაულის ჩადენის და მოწმეებზე ზემოქმედების.

დაცვის მხარე ბრალდების მიერ დაყენებულ შუამდგომლობას არ დაეთანხმა. როგორც ადვოკატმა ზაალ თეთაძემ განაცხადა, მორჩაძე მოწმეებზე ზეგავლენას ვერ მოახდენდა, რადგან ყველა მოწმე უკვე დაკითხულია. მისი განმარტებით, ბრალდების მხარემ მისი მიმალვის საფრთხის დასაბუთებაც ვერ შეძლო.

მან სასამართლოს მორჩაძის 10 000 ლარიანი გირაოს სანაცვლოდ გათავოსუფლება სთხოვა.

მერაბ მორჩაძე ხორავას ქუჩაზე მომხდარი მკვლელობის საქმეზე ერთ-ერთი მსჯავრდებულის გ.ჯ.-ს მამის მეგობარია. სახელმწიფო ბრალდება მორჩაძეს ედავება, რომ მან ხორავას ქუჩაზე მომხდარ მკვლელობაში თვითმხილველი მოწმის, მიხეილ კალანდიას მოსყიდვა მოახდინა.

შსს-ინფორმაციით, მერაბ მორჩაძემ, სასამართლოში ჩვენების შეცვლის მიზნით, გავლენა მოახდინა ბრალდებულ მ.კ.-ზე, რომელიც მკვლელობის ჩადენაში ამხელდა მერაბ მორჩაძის მეგობრის შვილს - ბრალდებულ გ.ჯ.-ს. მერაბ მორჩაძე არაერთხელ შეხვდა ძმებს - მ.კ.-ს და ლ.კ.-ს, ბრალდებულ გ. ჯ.-ს სასარგებლოდ ჩვენების შეცვლის მიზნით, გადასცა მათ გარკვეული თანხა და სანაცვლოდ მ.კ.-ს მოსთხოვა სასამართლოში ცრუ ჩვენების მიცემა, რომ თითქოს მ.კ.-ს დანაშაულის ჩადენის მომენტში გ.ჯ.-ს ხელში არ დაუნახავს მკვლელობის იარაღი. მერაბ მორჩაძე მ.კ.-ს ასევე დაპირდა სამართალდამცავ ორგანოებთან ჩვენების შეცვლით გამოწვეული შესაძლო პრობლემების მოგვარებას და საკუთარი კავშირების გამოყენებას საზოგადოებრივ აზრზე ზემოქმედებისთვის.

შედეგად, 2018 წლის აპრილში სასამართლოში ჩვენების მიცემისას, გამოძიებაში მიცემული ჩვენებისგან განსხვავებით, მ.კ.-მ განაცხადა, რომ მკვლელობაში ბრალდებულ გ.ჯ.-ს ხელში დანა არ დაუნახავს.
მორჩაზის მიმართ წაყენებული ბრალი ჯარიმას ან 3-დან 6 წლამდე თავისუფლების აღკვეთას ითვალისწინებს.